Փաստ ինֆո

«Արդեն ավելի քան 15 օր է Ադրբեջանը ակտիվ թիրախում է պահում արցախա- ադրբեջանական շփման գծի ողջ երկայնքը՝ բոլոր ուղղություններով։ Նրանք հատկապես երկու ուղղությամբ են փորձում աշխատել՝ հյուսիսում և հարավում։ Խնդիրը նրանում է, որ հիմնական ուժեղ գրոհները ն իրականացնում են այնտեղ, որտեղ իրենց համար աշխարհագրական դիրքն ավելի հարմար է թվում։ Այս առումով շփման գծի հարավային հատվածն իրենց դաշտավայրային տարածքներ է ներկայացնում, հենց այդ պատճառով էլ ադրբեջանական կողմից այդ ուղղությամբ գրոհներ ավելի ինտենսիվ են,- ասում է քաղաքագետ Հրանտ Մելիք Շահնազարյանը, «Փաստինֆո»-ի հետ զրույցում վերլուծելով վերջին օրերի ադրբեջանական ագրեսիայի աշխարհագրական դիրքն ու դրանից բխող նրանց ռազմական հեռանկարների հավանական զարգացումը,- նրանք, երևի թե ուժերի վերադասավորությամբ փորձում են հաջողություններ գրանցել ճակատի մյուս հատվածում։ Գրոհելու համար հարավն ամենահարմար շրջանն է, որն էլ, հավանաբար, իրենք փորձում են օգտագործել։ Ե՛վ հարավում, և՛ հյուսիսում գերխնդիրը Ադրբեջանի համար մնում է Արցախի տարածքների գրավումը»։

Պատասխանելով հարցին՝ կհարվածի՞ ռազմական ագրեսորը Հայաստանի Հանրապետության սահմաններին, քաղաքագետը նկատում է.«Չեմ կարծում, թե Ադրբեջանում այդքան արկածախնդիր կգտնվեն անգամ այս իրավիճակում Հայաստանի Հանրապետության տարածքի նկատմամբ որոշակի ռազմական գործողություններ անելու համար։ Իսկ եթե դրան գնա Թուրքիան՝ Նախիջևանի կողմից, ապա սա բացառելու համար պետք է ակտիվ աշխատի դիվանագիտությունը, որպեսզի Թուրքիայի ավելի մեծ ներգրավվածություն ռազմական գործողություններին, քան այս պահ է, բացառվի»,- ասում է Հրանտ Մելիք - Շահնազարյանը։

Հեղինակ՝ Նվարդ Մանվելյան

Աղբյուր` Փաստինֆո