Փաստ ինֆո

Հայաստանը եղել և մնում է ԼՂ անվտանգության երաշխիքը։ Գոյություն ունենալու իր իրավունքի համար ԼՂ-ի պարագայում պայքարի հարցն ավելի քան իրական է այսօր՝ հաշվի առնելով այն, ինչ կատարվում այսօր։ Այս մասին Մոսկվայում տեղի ունեցած ասուլիսի ընթացքում ասել է ՀՀ ԱԳ նախարար Զոհրաբ Մնացականյանը։

Մնացականյանի խոսքերով՝ վաղուց է անհրաժեշտ ներդնել հրադադարի պահպանման ստուգման մեխանիզմ, շատ առաջարկներ է եղել, սակայն հայկական և ղարաբաղյան կողմը չէ, որ հրաժարվել են այդ մեխանիզմներից, այլ՝ ադրբեջանական կողմը, այդ իսկ պատճառով էլ ունենք այն, ինչ ունենք, ուստի՝այդ տեսանկյունից Հայաստանի և Ղարաբաղի դեմ ուղղված մեղադրանքներն ընդունել չի պատրաստվում։

ԱԳ նախարարի խոսքով՝ առաջնային խնդիրը կրակի դադարեցման ապահովումն է և հրադադարի պահպանման մեխանիզմների ապահովումը և այսօր մենք ունենք իրավիճակ, երբ չենք հասել այն մակարդակին, երբ կարող ենք աշխատանքներ իրականացնել մեր հայտարարության առաջին կետի վերաբերյալ։ Նրա փոխանցմամբ՝ այսօր կոնսուլտացիաներ են ընթանում Կարմիր Խաչի և ՌԴ միջնորդությամբ՝ մեխանիզմներ գտնելու համար, որ կարողանանք աշխատել և ամուր հիմք ստեղծել, բավականին ամուր հրադադարի հասնենք՝ հումանիտար աշխատանքներ իրականացնելու համար։ Դրան ներգրավված են նաև երեք համանախագահները։

Ըստ նրա՝ եթե չկարողանանք պահպանել հրադադարը, այն կշարունակի բացասական հետևանքներ ունենալ մնացած հարցերի վրա, ուստի՝ հրադադարի պահպանումը և ամրապնդումը առաջնային խնդիր է։

ՌԴ ԱԳՆ Սերգեյ Լավրովն էլ հայտնեց, որ քննարկվել է նաև հրադադարի պահպանման մեխանիզմների հարցը և , հաշվի առնելով ԼՂ շուրջ սուր իրավիճակը, չի կարելի ձգձգել այդ մեխանիզմների ստեղծման հարցը, այժմ աշխատանքներ են իրականացվում, ՌԴ-ն մասնակցում է, մասնակցում են նաև համանախագահները, ինչպես նաև Կարմիր Խաչի կազմակերպությունը, որի հետ կոնտակտի մեջ են։ Ինչ վերաբերում է ՌԴ-ի հետագա մասնակցությանը, Լավրովը հայտնեց, որ այդ հարցով կզբաղվեն ակտիվորեն, ինչպես որպես ԵԱՀԿ Մինսկի համանախագահող երկիր, այնպես էլ՝ ինչպես ՌԴ՝ որպես շատ մոտ դաշնակի, ռազմավարչական դաշնակից և կարծում է, որ հումանիտար հրադադարի կնքման համար գործադրված ջանքերը զուր չեն կորչի։

Աղբյուր` Փաստինֆո