Փաստ ինֆո

Թալիշի դեպքերը կրկնվել են Հադրութում. ԱՀ ՄԻՊ

Հադրութում տեղի ունեցածը նման է 2016թ ապրիլին Թալիշում տեղի ունեցած դեպքերին։ Թալիշի դեպքերը կրկնվել են Հադրութում, քանի որ իրենք անզեն, անօգնական, այդ թվում՝ հաշմանդամություն ունեցող անձանց ուղիղ կերպով թիրախավորել, սպանել են։ Այս մասին «Փաստինֆո»-ի հետ զրույցում ասաց ԱՀ ՄԻՊ Արտակ Բեգլարյանը։

Ավելի վաղ հայտնել ենք, որ սեպտեմբերի 27-ից Ադրբեջանի կողմից սանձազերծված ագրեսիայի հետևանքով արդեն 15-րդ օրն է, ինչ փաստացի պատերազմ է ընթանում: Չնայած հոկտեմբերի 10-ին՝ ժամը 12-ից հումանիտար հրադադար հայտարարելու մասին Մոսկվայում Հայաստանի, Ռուսաստանի ու Ադրբեջանի արտգործնախարարների ձեռք բերած պայմանավորվածությանը, Ադրբեջանը խախտել է այն՝ հրթիռակոծելով Ստեփանակերտը և այլ բնակավայրեր, դիվերսիոն ներթափանցում իրականացրել՝ Հադրութ քաղաքի ուղղությամբ։ Թեև հակառակորդի առաջխաղացումը կանխվել է, բայց թշնամին, հավատարիմ մնալով իր ձեռագրին, սպանել է երկու քաղաքացիական անձի՝ հաշմանդամություն ունեցող երեխայի և նրա մորը: Նման դեպք տեղի է ունեցել նաև 2016թ Ապրիլյան պատերազմի ժամանակ, երբ ադրբեջանցիները մտել են տարեց ամուսինների տուն, սպանել նարանց, ապա կտրել ականջները:

Արտակ Բեգլարյանը «Փաստինֆո»-ի հետ զրույցում նշեց, որ լուսանկարներ է հրապարակվել, որտեղ երևում է, որ տղայի ձեռքի ափին ևս կրակել են, ինչը նշանակում է, որ հաշմանդամություն ունեցող տղան ձեռքը բարձրացրել է պաշտպանվելու կամ ցույց տալու համար, որ զինված չէ։

«Այստեղից ակնհայտ է, որ ադրբեջանական զինված ուժերը նորից շարունակում են տեռորիզմը, նորից շարունակում են պատերազմական հանցագործությունները և դրա խորքում ընկած է նաև հայատյացության ընդգծված տրամադրությունները» ,- նշեց Բեգլարյանը՝ հավելելով, որ Հադրութի դեպքերը դեռևս ավելի մանրամասն չենք կարողացել պարզել։

Անդրադառնալով զինծառայողների մարմինների նկատմամբ հնարավոր ոտնձգություններին՝ Բեգլարյանը նշեց, որ կան որոշ տեսանյութեր, այդ թվում՝ վարձկան ահաբեկիչների մասնակցությամբ, ինչի հիման վրա են ասում, որ բարձր հավանականությամբ արդեն նմանատիպ դեպքեր, խոշտանգումներ, վայրագություններ արձանագրվել են։

«Հաշվի առնելով նաև 2016թ բացասական փորձառությունը, դրան անպատժելիությունը, ավելին՝ Ադրբեջանի իշխանությունների կողմից խրախուսումը, այնուհետև՝ հայատյացության քաղաքականության ակտիվ շարունակությունը և վարձկան ահաբեկիչների ընդգրկումն այս պատերազմում, հավանականությունը շատ բարձր է, որ հայ զինծառայողների մարմինների հանդեպ նման վայրագությունները կկրկնվեն»,- նշեց Բեգլարյանը։

Նրա փոխանցմամբ՝ սեպտեմբերի 27-ից առ այսօր բազմաթիվ կոնվենցիաներ, այդ թվում՝ Ժնևյան, խախտվել են, սակայն խախտումների վերաբերյալ ավելի հստակ իրավական վերլուծություններ կներկայացվեն, երբ ակնհայտորեն ապացուցվի և ծավալները հասկացվի ՝ զինծառայողների և նրանց մարմինների նկատմամբ կատարված հանցագործությունների։

Նշենք, որ ԱՀ ՄԻՊ-ի զեկույցի համաձայն՝ մինչև հոկտեմբերի 9-ը ներառյալ սպանվել է ընդհանուր 20 խաղաղ բնակիչ, որից 1 մանկահասակ աղջիկ, 7 կին և 12 տղամարդ: Մանկահասակ երեխան, հինգ կանայք և չորս տղամարդիկ սպանվել են իրենց տան բակում, իսկ մյուսները՝ տարբեր հանրային վայրերում (կենտրոնական հրապարակ, թաղամաս):

Բեգլարյանն արձանագրեց, որ քաղաքացիական օբյեկտները և բնակիչները թիրախավորվել են՝ հրետանիով, հրթիռային միջոցներով և ԱԹՍ-ներով, ինչի հետևանքով արդեն կան բազմաթիվ զոհեր։ Բեգլարյանը նշեց, որ զեկույցը բազմաթիվ խողովակներով, բազմաթիվ տեղեր ուղարկվել է և կշարունակեն դեռևս ուղարկել։ Նրա փոխանցմամբ՝ միջազգային կառույցներից դեռևս արձագանք չկա։

Հիշեցնենք, որ սեպտեմբերի 27-ին Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքիան, վարձկան-ահաբեկիչներ՝ Սմերչ, Պոլոնեզ, թուրքական Կասիրգա եւ այլ զինատեսակներով հրթիռակոծելով խաղաղ բնակավայրերը, այդ թվում մայրաքաղաք Ստեփանակերտը։ ՀՀ ԱԳՆ-ն հայտարարել է, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։ Հայաստանում եւ Արցախում սեպտեմբերի 27-ին հայտարարվել է ռազմական դրություն և ընդհանուր զորահավաք։ Թեև հոկտեմբերի 10-ին՝ ժամը 12-ից հումանիտար հրադադար հայտարարելու մասին Մոսկվայում Հայաստանի, Ռուսաստանի ու Ադրբեջանի արտգործնախարարների ձեռք բերած պայմանավորվածությանը, Ադրբեջանը խախտել է հրադադարը:

ԱՀ ՄԻՊ Արտակ Բեգլարյանը երեկ ադրբեջանական վայրագությունները փաստող լուսանկարներ է հրապարակել. կից ներկայացվում են լուսանկարները

Հեղինակ՝ Իզաբել Սահակյան

Աղբյուր` Փաստինֆո