Փաստ ինֆո

«1915 թվականից Թուրքիայի քաղաքականությունը չի փոխվում։ Չգիտեմ՝ դեռ քանի անգամ պետք է պատմությունը կրկնվի, որ աշխարհը սա հասկանա։ Հուսամ՝ ողջ աշխարհի հայերի մոտ չկա այդ պատրանքը, որ թշնամուն կարելի է վստահել։ Արդեն պետք է վերանալ հակառակորդ հասկացությունից, Թուրքիան մեր թշնամին է՝ Ադրբեջանի հետ միասին,-«Փաստինֆո»-ի հետ զրույց ասում է քաղաքագետ Թևան Պողոսյանն, անդրադառնալով ահաբեկիչ Թուրքիա – Ադրբեջան տանդեմի կողմից սեպտեմբերի 27-ից արցախա – ադրբեջանական շփման գծի ողջ երկայնքով սանձազերծված ռազմական աննախադեպ ագրեսիայի թեմային և հավելում,- մեր թշնամին միայն ուժի լեզուն է հասկանում, հետևաբար մենք պետք է ուժեղ լինենք, որ կարողանանք մերը պարտադրել, իսկ երբ գալիս է ժամանակը, պետք է ճիշտ հաշվարկել, թե ո՞ր գործընկերների հետ ենք միասնական ուժ ձևավորելու, որպեսզի մեր պարտադրանքը գործի վերածենք»։ 

Թևան Պողոսյանն ընդգծում է՝ մեզ համար սա ուղղակի հայրենական պատերազմի մի ընկալում է՝ Թուրքիայի որդեգրած քաղաքականության նկատմամբ, բայց աշխարհը ևս պետք է ընկալի, որ այստեղ տեղի են ունենում այնպիսի մարտահրավերներ, որ կարող են լուրջ խնդիրներ ստեղծել մի շարք պետությունների անվտանգության համար.«Եթե Թուրքիան այս տարածքում իր ոտքերն բավարար չափով ամրացնի, կրկնելու է այն, ինչ արեց Սիրիայում՝ ճամբարներ է պատրաստելու, որտեղից և՛ Իրանի, և՛ Ռուսաստանի Դաշնության վրա է նրանց ուղարկելու, և ո՞վ է ասել, որ այդ վարձկան ահաբեկիչները Վրաստանի սահմանով այլ երկրներ չեն գնալու և տարածվելու։ Աշխարհը պետք է գիտակցի, որ այսօրվա դրությամբ Արցախի Պաշտպանության բանակը, Հայաստանն ու ողջ հայությունը պայքարում է համաշխարհային այդ հիվանդության՝ ահաբեկիչների դեմ։ Այլ կերպ ասած՝ մեր տարածաշրջանը դարձել է Թուրքիա – Ռուսաստան հիբրիդային պատերազմի վայրը, ինչպես Սիրիայում կամ Միջին Արևելքում է։

Ինչ վերաբերում է Ռուսաստանի որդեգրած քաղաքականությանը վերաբերող հարցին՝ կարծում եմ առաջին հերթին նաև հենց իրենց շահերի մեջ է մտնում գիտակցել, որ, օրինակ, այն 4000 վարձկան ահաբեկիչները, որոնց Թուրքիան ներմուծել է այս տարածք, ինչքան էլ, որ Արցախի Պաշտպանության բանակը դրանց մի մեծ մասին վերացնի, մի զանգված փախնելու է կամ հարավ՝ Իրանի տարածք, կամ հյուսիս՝ Ռուսաստանի Դաշնություն։ Հետևաբար, մի օր թե՛ Իրանը, թե՛ Ռուսաստանը մի օր առճակատվելու ենք այս խնդրի հետ, տեղի՞ն չէ, որ նրանք հիմա միանան մեզ և փորձենք միացյալ ուժերով լուծենք այս խնդիրը, որ Թուրքիան է դրել մեր առաջ»։

Խոսելով ստեղծված իրավիճակում ներքաղաքական կեցվածքի և այս ուղղությամբ տարբող աշխատանքների թեմային, քաղաքագետը հատուկ կերպով նշում է՝ ինչպես մեր տղաներն են այս օրերին հողին կանգնած պայքարում, որպեսզի մենք կերտենք մեր հերթական հաղթանակները, այնպես էլ պետության մնացյալ բոլոր օղակները պետք է շարունակեն իրենց բնականոն աշխատանքը, որպեսզի մեր հաղթանակն ամբողջական լինի.«Այստեղ հատկապես կարևոր է հենց դիվանագիտական կորպուսի ճիշտ և համակարգված աշխատանքը, որովհետև դա նույնպես մարտադաշտ է, որտեղ մեզ հստակ ու կայուն հաղթանակներ են պետք։ Մենք մեր պետության ներսում, բոլորով միասին, ամեն կերպ աշխարհին ցույց ենք տալու և ապացուցելու ենք, թե ինչ է իրականում կատարվում այստեղ մեզ հետ։

Խոսելով վերջանական հաղթանակի կերտման ճանապարհի և դրան հասնելու ուղիների մասին, Թևան Պողոսյանն ընդգծում է՝ ստեղծված իրավիճակում հայ ժողովրդի հիմնական և ռեալ դաշնակիցը հենց մեր միասնականությունն է.

«Մենք պայքարելու ենք, կռվելու ենք, եթե պետք լինի՝ մահանալու ենք այստեղ՝ մեր հողի վրա ազատ և անկախ ապրելու իրավունքը ձեռք բերելու համար։ Լավ ենք անում, որ մեզ պաշտպանում ենք, պաշտպանելուց էլ պայքարելու ենք մինչև վերջ, թույլ չենք տալու, որ մեզ սպանեն, արդյունքների մասին էլ թող ուրիշները մտածեն»,- ասում է Թևան Պողոսյանը։

Մանրամասները՝ տեսանյութում

Հեղինակ՝ Նվարդ Մանվելյան

Աղբյուր` Փաստինֆո