Փաստ ինֆո

ՀՀ երկրորդ նախագահ Ռոբերտ Քոչարյանի հասցեին սուտ մատնություն կատարելու առթիվ հանցագործության մասին հաղորդում է ներկայացվել ՀՀ գլխավոր դատախազություն՝ ԱԺ պատգամավոր Արման Բաբաջանյանին պատկանող «1in.am» լրատվականի դեմ։ 

Փաստացի պատերազմական իրավիճակում գտնվող երկրում վերջին շրջանում մամուլում հրապարակումներ են լինում, այսպես կոչված, ներքին դավաճանների վերաբերյալ։ Նմանատիպ հրապարակումներ են եղել նաև ԱԺ պատգամավորին պատկանող լրատվականում, մասնավորապես, լրատվամիջոցը գրել էր, որ «դավաճանը» Արցախում հանդիպում է ունեցել Ռոբերտ Քոչարյանի, Արթուր Վանեցյանի և Սերժ Սարգսյանի հետ, մեկ այլ հրապարակմամբ նշվել էր, թե «դավաճանները սպասարկում են Ալիևի զավակների՝ Ռոբերտ Քոչարյանի, Սերժ Սարգսյանի շահերը»։

Ռոբերտ Քոչարյանի պաշտպան Արամ Վարդևանյանը «Փաստինֆո»-ի հետ զրույցում նշեց, որ ռազմական դրության պայմաններում, երբ հանրության ամբողջ կենտրոնացումը, նույնիսկ՝ մասնագիտական համայնքում կենտրոնացած է հայոց բանակի վրա, նման ակնհայտ սուտ հրապարակումը ոչ միայն լկտի սուտ է, ոչ միայն ակնհայտ սադրանք է՝ խուճապ, պառակտում առաջացելու նպատակով, այլև՝ դասական իմաստով քրեաիրավական գնահատման ենթակա արարք է՝ առնվազն ՀՀ քրեական օրենսգրքի սուտ մատնության հատկանիշներով։

«Հենց այս լույսի ներքո էլ հաղորդումը ներկայացվել է գլխավոր դատախազին՝ այս տրամաբանության մեջ։ Վերլուծել ենք նաև ԵԴ նախադեպային իրավունքը, որը ևս հստակ արձանագրում է, որ խոսքի ազատությունն անսահմանափակ լինել չի կարող, այն, իհարկե, ունի նաև սահմաններ՝ այդ թվում քրեաիրավական »,- նշեց Վարդևանյանը։

Պաշտպանը նշեց, որ այս փուլում հարցը կարելի է դիտարկել սուտ մատնության տիրույթում, մասնավորապես, փաստացի հնչեցվում են կատեգորիկ գնահատականներ, որոնք մեկը մյուսից զրպարտչական են, ավելին՝ ծանր կամ առանձնապես ծանր հանցանքի մեջ է մեղադրանք ներկայացվում լրատվականի կողմից։

Ինչ վերաբերում է այն հանգամանքին, որ ռազմական դրության պայմաններում նոր սահմանափակումների ներքո պետական պաշտոնյաների կողմից ևս կարող են հնչեցվել նմանատիպ հայտարարություններ, Վարդևանյանը նշեց, որ ռազմական դրության պայմաններում պետական պաշտոնյաները պետք է ունենան այնպիսի զգոնություն՝ գիտակցելու համար, որ ցանկացած նման գործողություն կամ արարք ևս իրենից ենթադրում է ռազմական դրության նոր սահմանափակումների ներքո ընդհանուր ՀՀ անվտանգության, մարտունակության խաթարման էլեմենտներ, քանի որ դա միասնականության մթնոլորտի տեսանկյունից կարող է սեպ խրել դրա մեջ, իսկ արդեն դրան պատասխանելն ինքնին խնդիր չի առաջացնի։

«Այլ հարց է, որ այս ողջ ընթացքում առնվազն ես ինքս կողքից հետևելով նկատել եմ, որ որևէ նման արձագանքելու կամ պատասխաններ տալու վիճակ չէ։ Առնվազն այդ զսպվածությունը ես տեսնում եմ՝ ոչ պաշտոնատար անձանց կողմից»,- նշեց Վարդևանյանը։

Հիշեցնենք, որ սեպտեմբերի 27-ին Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքիան, վարձկան-ահաբեկիչներ՝ Սմերչ, Պոլոնեզ, թուրքական Կասիրգա եւ այլ զինատեսակներով հրթիռակոծելով խաղաղ բնակավայրերը, այդ թվում մայրաքաղաք Ստեփանակերտը։ ՀՀ ԱԳՆ-ն հայտարարել է, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։ Հայաստանում եւ Արցախում սեպտեմբերի 27-ին հայտարարվել է ռազմական դրություն և ընդհանուր զորահավաք։

Հեղինակ՝ Իզաբել Սահակյան

Աղբյուր` Փաստինֆո