Փաստ ինֆո

Թուրքիայի միացումն Ադրբեջանին ունի հստակ ձևավորված նպատակ, այն է՝ ավարտել ցեղասպանությունը,- «Փաստինֆո»-ի հետ զրույցում ասաց ՀՀ առաջին ՄԻՊ Լարիսա Ալավերդյանը՝ անդրադառնալով Արցախի նկատմամբ Ադրբեջանի կողմից ռազմական ագրեսիային, որին ներգրավված է նաև Թուրքիան։

Ալավերդյանը գտնում է, որ հենց այդ հիմքերը պետք է օգտագործվեն և կիրառվեն դիվանագիտական հարթակներում, չպետք է օգտագործել «Արցախի ինքնորոշման իրավունք» արտահայտությունը, քանի որ դա անմիջականորեն գործող նորմ է, ուստի պետք է հստակեցվի, որ պայքարում ենք ոչ թե ինքնորոշման իրավունքի ճանաչման, այլ՝ անջատման և անջատված լինելու իրավունքի։ Ալավերդյանը հիշեցրեց, որ 90-ականներին ամբողջական պարտվողական հունի մեջ է դրվել Արցախի հիմնահարցը, քանի որ պատերազմի ամենաթեժ պահին՝ 1991թ ստորագրվել են փաստաթղթեր, իսկ 1992թ ՀՀ առաջին նախագահը հայտարարել է, որ Հայաստանը համաձայն է, որ Արցախը մնա Ադրբեջանի կազմում՝ միայն ինքնավար հանրապետության կազմում, ինչը կոպտագույն սխալ էր և այդ հունից առ այսօր դուրս չենք եկել։

Այսօր էլ շարունակվում է ցեղասպանությանն ուղղված գործողություններ,ընդ որում՝ ցուցադրական, ինչը Ալավերդյանի կարծիքով ուղղված է ոչ միայն մեր ժողովրդի, այլև՝ հակառակորդի և արտաքին հանրության համար, մասնավորապես՝ փորձ է արվում ցուցադրել, որ միջազգային իրավունքը մերժվում է՝ պատճառաբանելով, թե օկուպացված տարածքներ են։

«Դուք պատկերացնու՞մ եք ինչքան անմարդկային են։ Նրանց մտածելակերպը և գործելակերպն այդտեղից է բխում, իրենք կարծում են, որ, եթե դա, օրինակ՝ իրենց տարածքն է, ապա կարող են գնդակոծել, այդ թվում՝ արգելված զինատեսակներով։ Գործ ունենք ճանաչված ԻԳԻԼ-ի նման մի պետության հետ։ ԻԳԻԼ-ն արգելված է շատ պետություններում, իսկ երբ խոսում են Ադրբեջանի մասին, ապա այն ճանաչված է ՄԱԿ-ի կողմից, ԵԽ անդամ պետություն է, ԵԱՀԿ-ի անդամ պետություն է։ Միթե՞ չկա այն գործիքակազմը, որով ոչ թե մեզ կոչ անեն առանց նախապայմանների վերադառնալ, զինադադար հաստատել, այլև՝ հստակեցնել, որ կողմերից մեկը՝ տվյալ դեպքում Ադրբեջանի և նրա թիկունքին կանգնած Թուրքիայի գործողություններում առկա են միջազգային հանցագործության հատկանիշներ»,- նշեց Ալավերդյանը։

Հեղինակ՝ Իզաբել Սահակյան

Մանրամասները՝ տեսանյութում

Աղբյուր` Փաստինֆո