Փաստ ինֆո

Քիչ առաջ Արցախից Երևանի Էրեբունի բժշկական կենտրոն տեղափոխվեց Շուշիի Սբ. Ղազանչեցոց եկեղեցու երկրորդ հրթիռակոծության հետևանքով ծանր վիրավորում ստացած ռուս լրագրող Յուրի Պետրովիչ Կատյոնկը։ Նրա վիճակն այս պահին գնահատվում է կայուն ծանր, վիրավորում ստացած լրագրողը արհեստական կոմայի մեջ է։ 

Էրեբունի ԲԿ-ի գործադիր տնօրեն, պրոֆեսոր բ.գ.դ. Միքայել Մանուկյանը լրագրողների հետ զրույցում տեղեկացրեց, որ Արցախից այսօր առավոտյան Երևանի Էրեբունի բժշկական կենտրոն են տեղափոխվել տարբեր աստիճանի մարմնական վնասվածքներով երեք արտասահմանյան լրագրող։

Քիչ առաջ տեղափոխված ռուս լրագրող Յուրի Պետրովիչ Կատյոնկը բարեհաջող վիրահատություն է ունեցել Ստեփանակերտի բժշկական կենտրոնում, վիճակն այս պահին գնահատվում է կայուն ծանր։ Էրեբունի բժշկական կենտրոն տեղափոխվելուց անմիջապես հետո կանցնի բոլոր անհրաժեշտ ստուգումները, հարկ եղած դեպքում կստանա անհրաժեշտ բուժօգնությունը, լրագրողների հետ զրույցում ասում է Միքայել Մանուկյանը։

Կտեղափոխվի արդյո՞ք ռազմական լրագրողը Ռուսաստանի Դաշնություն՝ այնտեղ բուժումը շարունակելու համար, այս պահին Էրեբունի ԲԿ-ի գործադիր տնօրենը հստակ ոչինչ ասել չի կարող։ Սպասում են ռուսական կողմի որոշմանը.«Եթե անհրաժեշտություն լինի, որպեսզի նա շարունակի բուժումը ստանալ այստեղ՝ Երևանում, ապա էրեբունի ԲԿ-ն պատրաստ է ամբողջական և լիարժեք բուժման կուրս ապահովել Շուշիում ծանր վիրավորում ստացած ռուս լրագրողի համար», տեղեկացնում է Միքայել Մանուկյանը։

Հիշեցնենք, որ Շուշիում Սբ. Ղազանչեցոց եկեղեցու մոտ հրետակոծության արդյունքում երեկ ծանր վիրավորում էին ստացել արտասահմանցի լրագրողներ, որոնցից մեկի՝ Յուրի Պետրովիչ Կատյոնկիի վիճակը գնահատվում է կայուն ծանր։ Հայաստանի Պաշտպանության նախարարության ներկայացուցիչ Արծրուն Հովհաննիսյանը տեղեկացրել էր, որ նրան տեղափոխել են հիվանդանոց, որտեղ վերջինս բարդ վիրահատական միջամտության է ենթարկվել։

Մանրամասները՝ տեսանյութում

Հեղինակ՝ Նվարդ Մանվելյան

Աղբյուր` Փաստինֆո