Փաստ ինֆո

«Հայն այսօրվա դրությամբ ոչնչացման եզրին է։ Իմ երկու տղաներին Ղարաբաղի առաջին կռվին զոհ տվեցի, հիմա էլ տղաներիս թոռներն են պայքարում թուրքի դեմ։ Էդ երեխաներն ինչով են մեղավոր, որ իրենց պապիկներին զոհ են տվել հողը պաշտպանելիս, իսկ էսօր էդ նույն հողի վրա իրենք նապաստակի կյանքով են ապրում՝ թե հեսա – հեսա մեզ կսպանի։ Նրանք չեն ապրում՝ վախվորած գոյատևում են, -«Փաստինֆո»-ի հետ զրույցում ասում է արցախա-ադրբեջանական ռազմական ագրեսիայի հետևանքով Արցախից Հայաստանում պատսպարված բնակիչն ու կսկիծը սեղմելով միամիտ հարց տալիս, - ինչո՞ւ աշխարհի խոշոր տերությունները չեն համախմբվում և սանձում մուսուլմանական երկրներին՝ Ադրբեջանին և նրան զենք ու ահաբեկիչ մատակարարող Թուրքիային, որ իրենց այնքան իրավունք են վերապահում՝ ոտնահարելու աշխարհի խոշոր տերությունների դրած կարգերն ու օրենքները»։

Ինչո՞վ ուրախանանք, ասում է Արցախի բնակչուհին, որ այսօր հասել ենք 21- րդ դար, բայց մեզ նորից ուզում են ցեղասպանությա՞ն ենթարկեն։ Արյուն է հոսում ամեն տեղ, օրական էնքան զոհ ենք տալիս, որ բառերով ասելն այլևս անհնար է. «Որպես մեծ ծնող, ում պապերը զոհվել են, ում երկու տղաները հողին զոհ են գնացել, որ այսօր Հայաստանի ու Արցախի ժողովուրդն ազատ ապրեն, ես պահանջում եմ կանգնեցնել պատերազմը։ Ես այսպիսի կյանք չեմ ցանկանում։ Խնդրում եմ, պահանջում եմ և կոչ եմ անում՝ կանգ առեք»,-ասում է վերջինս։

Աբովյանի քաղաքի «Փարվանա ռեզորտ» հյուրանոցային համալիրում պատսպարված արցախցի մեր հայրենակիցները «Փաստինֆո»-ի տեսախցիկի առաջ պատմում էին, թե ինչպես թշնամին սանձազերծեց վերջին օրերի արյունոտ դեպքերը։ Գանձակի բնակիչը ասում է՝ իր համար առօրյա հոգերով էր զբաղված, երբ գյուղի գլխին պայթեց անօդաչու թռչող սարքի առաջին երկու մահաբեր ականներն՝ ուղիղ իրենց տան վրա.«Մենք մեր համար հանգիստ մեր տներում մեր գործերով էինք զբաղված։ Սկսած առաջին օրվանից՝ ամեն օր խփում են՝ ինչ տեսակ զենք ասես, որ չեն օգտագործում խաղաղ մարդկանց ոչնչացնելու համար՝ էլ օդուժ, էլ հրետանի, էլ հեռահար ռակետներ։ Խփում են որտեղ ուզում են՝ տների, բնակելի շենք - շինությունների վրա»։

Վերջինս պատմում է՝ Հայաստան է տեղափոխվել թոռների և ծոռների հետ միասին, երկու տղաները մնացել են առաջնագծում՝ կռիվ են տալիս թուրքի դեմ՝ պահելու իրենց հողն ու տունը։

Հիշեցնենք, որ արդեն 13-րդ օրն է, ինչ Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում են նաև Թուրքիան, վարձկան-ահաբեկիչներ՝ Սմերչ, Պոլոնեզ, թուրքական Կասիրգա և այլ զինատեսակներով հրթիռակոծելով խաղաղ բնակավայրերը, այդ թվում Արցախի մայրաքաղաք Ստեփանակերտը, Շուշին, կրակի թիրախ դարձնելով անգամ ամենափրկիչ Սբ. Ղազանչեցոց եկեղեցին։

ՀՀ ԱԳՆ-ն հայտարարել է, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։ Հայաստանում և Արցախում սեպտեմբերի 27-ից հայտարարվել է ռազմական դրություն և ընդհանուր զորահավաք։

Մանրամասները՝ տեսանյութում

Հեղինակ՝ Նվարդ Մանվելյան

Աղբյուր` Փաստինֆո