Փաստ ինֆո

ՌԴ նախագահ Վլադիմիր Պուտինի հրավերով այսօր Մոսկվայում տեղի է ունենում է Հայաստանի,Ռուսաստանի և Ադրբեջանի արտաքին գործերի նախարարների հանդիպումը: Ինչպես հայտնում են ԱԳՆ-ից՝ հանդիպման օրակարգում է բացառապես ռազմական գործողությունների դադարեցման, հումանիտար նպատակներով դիակների և գերիների փոխանակման հարցեր: 

Այս առիթով «Փաստինֆո»-ն զրուցել է «Կովկաս» ինստիտուտի տնօրեն, քաղաքագետ Ալեքսանդր Իսկանդարյանի հետ:

-Պարո՛ն Իսկանդարյան, ռուսական կողմի նախաձեռնությամբ այսօր Մոսկվայում կայանալու է Հայաստանի և Ադրբեջան ԱԳ նախարարների հանդիպումը՝ կողմերի միջև հրադադարի հաստատման օրակարգով:Ի՞ նչ սպասել հանդիպումից,կհաջողվի ՞ կողմերին ընդհանուր համաձայնության գալ:

Ակնհայտ է, որ Ռուսատանը՝ որպես Մինսկի խմբի համանախագահ երկիր, փորձում է ինչ-որ կերպ լուծել այս կոնֆլիկտը, իհարկե, ոչ թե Ղարաբաղյան կոնֆլիկտը ընդհանրապես, այլ՝ այս պահին ընթացող ռազմական գործողությունները: Սա առաջին լուրջ քայլն է ռազմական գործողությունները դադարեցնելու ուղղությամբ: Իսկ ինչ դիրքորոշում կունենա հակառակորդը՝ դժվարանում եմ ասել: Կարծում եմ շատ բան կախված է առաջնագծում տիրող իրավիճակից:Դժվարանում եմ ասել, արդյոք այս հանդիպումից անմիջապես հետո կողմերը կրակը կդադարեցնեն,թե՝ ոչ, բայց սա ինչ-որ քայլ է այդ ուղղությամբ:

-Այսօր արդեն հակամարտության 13-րդ օրն է: Մինչ այս եղել են բազմաթիվ կոչեր և հայտարարություններ թե՛ ռուսական կողմից, թե՛ միջազգային հանրության շրջանում: Բայց միայն զինված գործողությունների 12-րդ օրը ՌԴ նախագահը որոշեց հայտարարություններից զատ ձեռնարկել ավելի լուրջ քայլեր՝ հրադադարի հաստատման ուղղությամբ:

-Ռուսաստանը հակամարտության հենց սկզբից էլ ինչ-որ քայլեր ձեռնարկել է, այնպես չէ, որ միայն նոր է միջամտում: Եղել են հեռախոսազանգեր, հայտարարություններ, բայց կարծես այս ամենը բավարար չէր, ավելին էր պետք: Ակնհայտ է, որ մարտերը գնալով ավելի են թեժանում, ուստի ավելի շատ ջանքեր է պահանջվելու այս պահին կրակը դադարեցնելու համար:Նորից եմ նշում, չգիտեմ այսօրվա հանդիպման արդյունքում ինչ որոշում կկայացվի, բայց սա արդեն իսկ այդ ուղղությամբ լուրջ քայլ է:

-ՌԴ նախագահը նաև իր հայտարարությամբ կոչ է արել կողմերին դադարեցնել մարտական գործողությունները ՝ գերիների և զոհվածների մարմինների փոխանակման նպատակով։ Արդյո՞ ք այս անգամ հակառակորդը ականջալուր կլինի և կողմերին կհաջողվի շփման գոտում հրադադար հաստատել:

-Հնարավոր է, չեմ բացառում:Այս պահին Ադրբեջանի ղեկավարությունը հոգեպես էլ վատ վիճակում է,քանի որ այն ինչ նախապես ծրագրել էր՝ բլիցկրիգը ձախողվեց: Սրա մասին է վկայում նաև հակառակորդի անդադար և աննպատակ կրակոցները, դրանցում ոչ մի ռազմավարական նպատակ չկա, եկեղեցու և լրագրողների վրա կրակոցները միայն միջազգային հանրության աչքերում ցածրացնելու են Ադրբեջանի իմիջը:Առհասարակ, վերջին շրջանում Ադրբեջանի ղեկավարությունը կայացնում է որոշումներ, որոնցից կարող ենք ենթադրել, որ նրանք ոչ ռացիոնալ վիճակում են,այդ պատճառով դժվարանում են կանխորոշել նրանց դիրքորոշումը:

-Պարո՛ն Իսկանդարյան, ղարաբաղյան հակամարտության շուրջ բանակցություններ ընթանում են շուրջ 30 տարի, սակայն բանակցությունների արդյունքում հաջողվում է հաստատել միայն ժամանակավոր հրադադար կողմերի միջև: Հաշվի առնելով առնելով այն հանգամանքը՝ որ, չնայած բազմաթիվ կոչերին, Ադրբեջանը շարունակում է կրակ արձակել և թիրախավորել խաղաղ բնակչությանը, ի՞նչ երաշխիքներ կան, որ այս բանակցություններից որոշ ժամանակ անց հակառակորդը կրկին չի դիմի սադրանքների և չի վերսկսի իր ռազմական գործողությունները:

-Ոչ մի նման նախադրյալ չկա որ սրանով վերջնականապես կողմերը կդադարեցնեն կրակը, եթե հնարավոր լիներ ապէ բանակցություններ վաղուց են ընթանում արդեն: Հիմա խոսքը գնում է այս պահի մասին:Այն ինչ այս պահին կատարվում է շփման գծում արդեն հակամարտության սրում չէ, այլ՝ լայնածավալ պատերազմ, խոսքը գնում է այս պահին այդ պատերազմը դադարեցնելու մասին՝ հումանիտար նպատակով իսկ ինչ կլինի հետո կտեսնենք: Հիմա շատ կարևոր է գոնե կրակը դադարեցնել, հետո քայլ առ քայլ անցնել բանակցությունների:

Աղբյուր` Փաստինֆո