Փաստ ինֆո

ՀՀ Նախագահի հրամանագրով այսօր աշխատանքից ազատվել է ԱԱԾ տնօրեն Արգիշտի Քյարամյանը։ Որպես ազատման պատճառ ընդամենը նշվում է ՀՀ վարչապետի առաջարկությունը՝ համապատասխան ընթացակարգային հոդվածներին հղումներ անելով:

Ինչ խոսք, երբ պատերազմական շրջանում ԱԱԾ տնօրեն է ազատվում, լուրջ պատճառ պիտի լինի:

Հրապարակում արդեն իսկ ենթադրությունների մակարդակում տարբեր տեսակետներ են հայտնվում: Որևէ կոնկրետ տեսակետ չդիտարկելով, պարզապես կարելի է պատերազմի անցած օրերի քրոնիկոնից որոշ կարևոր փաստեր առանձնացնել: Դրանցից առաջինը, թերևս, հոկտեմբերի 1-ին մամուլը հեղեղած անսպասելի լուրն էր՝ պետական դավաճանության մեղադրանքով կալանավորված պաշտպանության նախարարության (ՊՆ) ինչ-որ նախկին բարձրաստիճան պաշտոնյայի մասին։

ԱԱԾ հաղորդմամբ՝ նա ադրբեջանական հետախուզական ծառայություններին պետական գաղտնիք պարունակող տեղեկություններ էր հայտնել Հայաստանի զինված ուժերի մասին։ Ըստ ԱԱԾ-ի՝ կալանավորված նախկին պաշտոնյան ադրբեջանցիների հետ հանդիպել է Վրաստանի տարածքում, որտեղ էլ ստացել է առաջադրանքներ` Արցախի և Հայաստանի արտաքին անվտանգության, զինված ուժերի, սպառազինությունների մասին տեղեկություններ ձեռք բերել և նրանց փոխանցել։ Պաշտոնյայի ինքնության ու աշխատած ժամանակահատվածի վերաբերյալ ԱԱԾ-ն այլ մանրամասներ չհայտնեց, սակայն, երկու օր անց՝ հոկտեմբերի 3-ին մեկ այլ ուշագրավ տեղեկատվություն ստացվեց: Ստացվեց Արցախից: ԱՀ նախագահ Արայիկ Հարությունյանն իր ֆեյսբուքյան էջում գրեց. «Հարգելի՛ հայրենակիցներ, այս պահին շարունակում եմ գտնվել առաջնագծում։ Ինձ հետ են նաև ԱՀ և ՀՀ ԱԱԾ տնօրենները։

Տղաները փայլուն են կատարում իրենց առջև դրված մարտական խնդիրը։ Ոգևորված եմ մեր զինծառայողների քաջությամբ ու արհեստավարժությամբ և մեր կամավորականների նվիրվածությամբ։

ԱԱԾ տնօրենների առաջնագծում գտնվելու լուրն ուղղակիորեն հաջորդել էր նախորդ՝ պետական դավաճանության մեղադրանքով կալանավորված ՊՆ նախկին պաշտոնյայի մասին տեղեկատվությանը:

Հարց է ծագում՝ կալանավորված տվյալ պաշտոնյան ե՞րբ է դարձել նախկին և արդյո՞ք ԱԱԾ պետի ազատման տարբերակներից մեկը չի կարող դիտարկվել հենց այս ազատման համատեքստում:

Ընդ որում, կարևոր է նաև այն փաստը, որ վերը նշված՝ պետական գաղտնիք հանդիսացող տեղեկությունները ադրբեջանցիներին է փոխանցվել Վրաստանի տարածքում, որտեղ փոխանցողը հանդիպումներ է ունեցել Ադրբեջանի դեսպանատանը և այլ վայրերում։

ԱԱԾ տնօրենի ազատման հարցն այլ երկրի պահանջով պայմանավորողներն, ըստ էության, կարող են որպես օրինակ նկատի ունենալ անցած 2 տարվա ընթացքում տեղի ունեցած բարձրաստիճան մեկ այլ պաշտոնյայի անսպասելի ազատում /խոսքը վարչապետի երբեմնի խորհրդական Արսեն Խառատյանի մասին է/, որի ազատման հետ կապված առայսօր տարբեր վարկածներ են շրջանառվում: Սորոսական թևը ներկայացնող տվյալ պաշտոնյան թեպետ այսօր ֆորմալ առումով որևէ պետական պաշտոն չի զբաղեցնում, սակայն տարածաշրջանային խնդիրների վերաբերյալ շարունակում է ունենալ կարևոր դերակատարում:

Աղբյուր` Փաստինֆո