Փաստ ինֆո

Միացյալ Նահանգները մտադիր է մասնակցել Լեռնային Ղարաբաղի հակամարտության կարգավորման շուրջ ԵԱՀԿ Մինսկի խմբի ձեւաչափով առաջիկա հանդիպումներին: Այս մասին ՏԱՍՍ-ի թղթակցին հայտնել է ԱՄՆ Պետդեպարտամենտի ներկայացուցիչը։

«ԱՄՆ - ը՝ որպես համանախագահ, մասնակցելու է ԵԱՀԿ Մինսկի խմբի հովանու ներքո գումարվող հանդիպումներին»,-հայտարարել է ԱՄՆ արտաքին քաղաքական գերատեսչության աշխատակիցը՝ մեկնաբանելով Ֆրանսիայի ԱԳ նախարար Ժան Իվ Լե Դրիանի հայտարարությունները:

Ֆրանսիայի ԱԳ նախարարն ավելի վաղ հայտարարել էր, որ Լեռնային Ղարաբաղի իրադրության շուրջ բանակցությունները նախատեսված են հոկտեմբերի 8-ին Ժնեւում եւ հոկտեմբերի 12-ին Մոսկվայում: Միացյալ Նահանգները Մինսկի խմբի համանախագահն է Ռուսաստանի և Ֆրանսիայի հետ միասին։

«Միացյալ Նահանգների դիրքորոշումը պարզ է և փոփոխության չի ենթարկվել. երկու կողմերն էլ (հակամարտության կողմերը՝ Ադրբեջանն ու Հայաստանը) պետք է անհապաղ դադարեցնեն ռազմական գործողությունները և սկսեն աշխատել Մինսկի խմբի համանախագահների հետ, որպեսզի հնարավորինս արագ վերադառնան բովանդակային բանակցություններին։ ԱՄՆ - ն, որպես ԵԱՀԿ Մինսկի խմբի համանախագահ, պահպանում է երկու կողմերին (Բաքվին եւ Երեւանին) օգնություն ցուցաբերելու հանձնառությունը։ Հակամարտության խաղաղ եւ կայուն լուծման հասնելու նպատակով», - հավաստիացրել է դիվանագետը:

Նա նաեւ հիշեցրել է, որ ԱՄՆ-ն արդեն «հակամարտության երկու կողմերին կոչ է արել վերադառնալ բովանդակալից բանակցություններին՝ Մինսկի խմբի հովանու ներքո»:

ԱՄՆ ներկայացուցչության աստիճանը ճշտելու խնդրանքին Պետդեպարտամենտի ներկայացուցիչը պատասխանել է. «Որպես Մինսկի խմբի ամերիկացի համանախագահ «...» աշխատում Է նդրյու Շոֆերը»: Շոֆերը կադրային դիվանագետ է, ներկայիս պաշտոնում նա նշանակվել է 2017 թվականի օգոստոսին։

Աղբյուր` Փաստինֆո