Փաստ ինֆո

ԱԱԾ տնօրենի պաշտոնում նշանակել մի մարդու, ով այդ համակարգում փորձ չունի և հուսալ, որ ժամանակի ընթացքում կհարմարվի՝ ամենամեծ սխալմունքն էր,-այս մասին «Փաստինֆո»-ի հետ զրույցում ասաց քաղաքագետ, «Ազգային անվտանգություն» կուսակցության նախագահ Գառնիկ Իսագուլյանը՝մեկնաբանելով ԱԱԾ տնօրեն Արգիշտի Քյարամյանի պաշտոնանկությունը:

Հիշեցնենք, որ Քյարամյանը ԱԱԾ տնօրեն էր նշանակվել 2020 թվականի մայիսին եւ ընդամենը 5 ամիս պաշտոնավարելուց հետո պաշտոնանկ եղավ։ Ընդ որում՝ վարչապետը որեւէ պարզաբանում չի ներկայացրել, թե ռազմական դրության մեջ գտնվող երկրում ինչու է պաշտոնանկ արվել Քյարամյանը, ում նշանակման համար անգամ օրենքն էր շրջանցվել։

Մեր զրուցակիցը դրական գնահատեց կառավարության այս որոշումը՝ վստահեցնելով, որ որոշումը կայացնելու համար եղել են հիմնավոր և ծանրակշիռ պատճառներ.

«Սկզբից էլ ասել եմ՝ Քյարամյանին այդ պաշտոնին նշանակելը աբսուրդ էր: ԱԱԾ տնօրեն էր նշանակվել մի երիտասարդ, որը համակարգից բացարձակ տեղեկություն չուներ։ Սա հանգեցնում է լուրջ խնդիրներ ոչ միայն համակարգի, այլ՝ պետության համար»:

Քաղաքագետի վստահեցմամբ՝ պատերազմական դրության ընթացքում բացահայտվում են այն բոլոր թերացումները, որոնք առակա են այս կամ այն համակարգում, իսկ մեզ նման պատերազմական վիճակում գտնվող երկրներում շատ կարևոր է,որ հատկապես նման կարևոր պաշտոններում նշանակվեն պրոֆեսիոնալներ, մարդիկ, ովքեր այդ ոլորտում տիրապետում են ամեն մանրուքի:

«Կարևորը, որ կառավարությունը կայացրել է ճիշտ և արագ որոշում՝ առանց այլ հանգամանքներ հաշվի առնելով»,-նշեց քաղաքագետը:

Վերջինս դրական գնահատեց նաև ԱԱԾ նոր ԺՊ-ի նշանակումը և վստահություն հայտնեց, որ բոլոր այն բաղթողումները, որ առկա են համակարգում, կշտկվեն:

«ԱԱԾ նոր ղեկավարը, ի տարբերություն նախորդի, բավականին փորձառու է, նոր չէ այս համակարգում, իր աշխատանքը սկսել է լեյտենանտից և հասել Քննչականի պետի, վստահ եմ շատ լավ կկատարի ԱԱԾ-ի առջև դրված բոլոր գործառույթները»,-նշեց զրուցակիցը:

Աղբյուր` Փաստինֆո