Փաստ ինֆո

ԱԱԾ արդեն նախկին տնօրեն Արգիշտի Քյարամյանի պաշտոնից ազատման մասին խոսակցություններն իրավական համակարգում եղել են ավելի վաղ՝ նախքան պատերազմական իրադարձություններին։ Ակնհայտ էր, որ խոսքը գնում էր քաղաքական հետաքրքրություն ունեցող մի շարք գործերով ԱԱԾ հսկողություն իրականացնող անձով նրան փոխարինելու մասին։ Այս մասին «Փաստինֆո»-ի հետ զրույցում ասաց փաստաբան Միհրան Պողոսյանը։

Ավելի վաղ տեղեկացրել ենք, որ նախագահի հոկտեմբերի 8-ի հրամանագրով Արգիշտի Քյարամյանն ազատվել է ԱԱԾ տնօրենի պաշտոնից։ Նույն օրվա մեկ այլ հրամանագրով՝ ԱԱԾ տնօրենի ԺՊ է նշանակվել Միքայել Համբարձումյանը, ով նախկինում ղեկավարել էր ԱԱԾ քննչական դեպարտամենտը, եւ ԱԱԾ տնօրենի տեղակալ է նշանակվել 2020 թվականի օգոստոսին։

Միհրան Պողոսյանը նկատեց, որ նոր նշանակվող անձը մասնակից է եղել հայտնի գործողություններին եւ հանրության համար հասկանալի է, թե ինչու է այդ անձը նշանակվում ԱԱԾ տնօրեն։ Փաստաբանն արդեն երկու տարի է բարձրաձայնում է, որ ԱԱԾ-ն պետության մեջ ունի իր ուրույն, առանձնահատուկ գործառույթները և պետք չէ քաղաքական պատվերներով ծանրաբեռնել ԱԱԾ-ն։

«Ցավոք, կարծում եմ, այդ գիտակցությունը դեռ տեղ չի հասել և ԱԱԾ-ն իր ժամանակի մի զգալի մասը կորցնում է՝ ոչ իրական գործառույթներով զբաղվելով։ Ցավ եմ ապրում, որ նույնիսկ այս իրավիճակում քաղաքական իշխանությունը դեռ շարունակում է առաջ մղվել այդ տրամաբանությամբ»,- նշեց Պողոսյանը՝ հավելելով, որ պատերազմական իրավիճակում քաղաքական հետապնդումներն իրականացվում են շատ ավելի մեծ թափով, քան նախկինում։

Պողոսյանը հիշեցրեց, որ նախկինում արդեն նման դեպքեր եղել են, մասնավորապես, Հայրենական պատերազմի տարիներին գործում էր «Յեժովշինա» տարբերակ, երբ քննիչների, ԱԱԾ ծառայողների խումբը, որոնք վստահաբար երբևէ առաջնագծում չէին հայտնվելու, զբաղված էին ազգի թշնամիներ փնտրելով, քաղաքական՝ սոցիալական իշխանության հակառակորդներին վերացնելով և այլ գործողություններով, ինչը դեռևս չի վերացվել ՀՀ-ում։

Ինչ վերաբերում է ԱԱԾ տնօրենի նորանշանակ ԺՊ Միքայել Համբարձումյանին, ապա հասարակությունը նրան տեսել է մի շարք «մարդ բռնելու» օպերացիաների ժամանակ՝ դրան մասնակցելիս կամ ղեկավարելիս, օրինակ՝ Մանվել Գրիգորյանի տան խուզարկությունը, Գագիկ Ծառուկյանի վերաբերյալ քրեական գործով օպերատիվ բլոկի ղեկավարումը։

Պողոսյանը ևս մեկ անգամ ընդգծեց, որ պետք է փոխվի մեր ԱԱԾ-ի տրամաբանությունը և ԱԱԾ-ն չպետք է սահմանափակվի քաղաքական պատվեր կատարելով և «մարդկանց բռնելով», ինչը իջեցնում է կառույցի վարկանիշը։

«Օրեր առաջ հրապարակվեց լրտեսների հետ կապված գործողությունները, ինչ խոսք, լավ աշխատանք էր, բայց, եթե դատում ենք նախորդ 2-2.5 տարվա ընթացքում ԱԱԾ իրականացրած գործողությունների համատեքստում, հարց է առաջանում՝ իսկ եթե զբաղված լինեին իրենց բուն գործառույթների իրականացմամբ, արդյոք այդ ամենն ավելի վաղ չէր բացահայտվի։ Բացի դա՝ եթե մենք տեսել ենք, թե ինչպես է աշխատում ԱԱԾ-ն, ինչ անօրինություններ են իրականացվում, այդ պարագայում մենք ինչ վստահություն պետք է ունենանք, որ սա ևս ինչ-որ բեմականացված շոուի մի մաս չէ»,- նշեց Պողոսյանը՝ հավելելով, որ հանրությունը պետք է վստահ լինի, որ ԱԱԾ-ն իր բուն գործառույթներով է զբաղված և, եթե 2.5 տարի իր բուն գործառույթներով զբաղված չէր, դժվար է հասարակությանը համոզելն այն կարծիքին , որ այժմ անցել են բուն գործողությունների կատարմանը։

Պողոսյանը հիշեցրեց նաև, որ բոլորովին վերջերս Գագիկ Ծառուկյանի փաստաբանները բարձրաձայնել են, որ ԱԱԾ ծառայողները ծանուցագրեր էին բաժանում, այլ գործողություններ իրականացնում, ուստի, հավատը կատարվող գործողությունների վերաբերյալ ցածր է։

Ինչպես արդեն տեղեկացրել ենք՝ սեպտեմբերի 27-ի վաղ առավոտյան Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքիան, վարձկան-ահաբեկիչներ՝ Սմերչ, Պոլոնեզ, թուրքական Կասիրգա եւ այլ զինատեսակներով հրթիռակոծելով խաղաղ բնակավայրերը, այդ թվում մայրաքաղաք Ստեփանակերտը։ ՀՀ ԱԳՆ-ն հայտարարել է, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։Հայաստանում եւ Արցախում սեպտեմբերի 27-ին հայտարարվել է ռազմական դրություն և ընդհանուր զորահավաք։

Հեղինակ՝ Իզաբել Սահակյան

Աղբյուր` Փաստինֆո