Փաստ ինֆո

Շենգավիթ ԲԿ-ում պատերազմի հաջորդ օրվանից ծնվել է 8 երեխա՝ 6 տղա, 2 աղջիկ։ Բժիշկները պատմում են, որ արցախցի ծննդկանները  հիմնականում հիվանդանոց են եկել անծանոթների ուղեկցությամբ։

«Փաստինֆո»-ի հետ զրույցում ծննդկանները պատմում էին, որ մինչև վերջին պահը չեն ցանկացել Երևան գալ, պլանավորել էին, որ իրենց երեխաները Արցախում՝ Ստեփանակերտում պետք է ծնվեին։ Տղամարդիկ են պարտադրել, որ գոնե հանուն երեխաների  անվտանգության համար պետք  է տեղափոխվեն ։

Սոնյա Գասպարյանն օրինակ, Երևան գալ պատրաստվեց, երբ Ստեփանակերտի երկնքում ԱԹՍ-ներ հայտնվեցին։ Ասում էր՝ ուզում էր Ղարաբաղում մնալ, բայց վախեցել են, որ ծննդատունը ինչ -որ պահից չի գործի։

Ամուսնուն փորձել է տղայի ծննդյան լուրն ասել, բայց կապ չի եղել։ Վստահ է, որ լուրն արդեն տեղ  է հասել։ Սպասում է, որ հայրենիքում խաղաղ լուսաբաց լինի ու անմիջապես հետ վերադառնա։

Օքսաննան ևս մեկ շաբաթ առաջ է Երևան Տեղափոխվել։ Ամուսինը մի քանի անգամ ճանապարհ է ընկել Արցախ ու վերադարձել, որպեսզի ընտանիքի և հարևանների կանանց ևս անվտանգ հասցնի Երևան։ Այստեղ ոչ ոքի չէին ճանաչում, ապրում են հյուրանոցում։

Շենգավիթ ԲԿ-ի մանկաբարձ գինեկոլոգներ Մարգո Մարտիրոսյանը և Սյուզաննա Արամյանը պատեցին, որ Արցախցի կանանց ցուցաբերում են առանձնահատուկ օգնություն, որովհետև այս դժվար իրավիճակում, երբ յուրաքանչյուրի նյարդերը կարող են տեղի տալ, հղի կանանց առանձնահատուկ ուշադրություն է պետք, հատկապես, երբ նրանք կարողացել են փախչել հրթիռակոծվող քաղաքից։

Պատերազմական վիճակը շատերին ստիպել է տանից անպատրաստ դուրս գալ, առանց զանգի հասնել Երևան, սակայն իրենց այստեղ մեծ աջակցություն են ցուցաբերում ոչ միայն բուժկենտրոնները, այլև անծանոթները։

Մեր հերոսուհիներից մեկն էլ երրորդ արու զավակին է լույս աշխարհ բերել՝ հոկտեմբերի յոթի ուշ գիշերին։ Ամուսնուն չի հասցրել տեղեկացնել։ Աչքերը արցունքներով լի ուզում էր հետ վերադառնել իրենց համայնք, իր աշխատանքին։ Ասում էր՝ Երևանում իրենց շատ լավ են պահում, բայց տանն ավելի լավ է։

Արցախցի մայրերին ԲԿ-ում բուժվող տղաները ծաղիկներ են նվիրել։ Խորհրդանշական են համարում, որ այսքան զոհերի կողքին իրենք արու զավակներ են լույս աշխարհ բերում։ ԲԿ-ից ասում են՝ մեծամասամբ հայորդիների անուններով են կոչում իրենց զավակներին։

Աղբյուր` Փաստինֆո