Փաստ ինֆո

Համախմբումը հոգեբանական իմաստով այն մեծ ձեռքբերումն է, որը պետք է շատ թանկ գնահատել և չկորցնել։ Այս իրավիճակում ջլատող ազդակներին նույնիսկ դժվար է անուն տալ։ Ցանկացած համակարգ ներսից թուլացնելու դեպքում, թշնամու գործը շատ է հեշտանում։ Այս մասին «Փաստինֆո»-ի հետ զրույցում ասաց հոգեբանական գիտությունների թեկնածու Կարինե Նալչաջյանը։

Նշենք, որ ռազմական դրության պայմաններում անգամ իշխանության տարբեր ներկայացուցիչներ կրկին փորձում են երկրի ներսում թշնամիներ և դավաճաններ փնտրել՝ արտաքին թշնամու և Ադրբեջանի սանձարձակության ֆոնին կրկին օրակարգ բերելով ներքին թշնամիներ ունենալու մասին թեզը։ Այսօր վարչապետը հայտարարեց, որ որոշ անձինք մարտի դաշտում գտնվող զինծառայողներին ասում են, որ «Նիկոլը հողերը ծախել է, թե սա իրականում պայմանավորված պատերազմ է, ձեզ էստեղ բերել-մսաղացի մեջ են գցել, որ կոտորեն, որ պայմանավորվածությունը չերեւա, դիրքերը պահելը իմաստ չունի» և այժմ ԱԱԾ-ն զբաղվում է դրանով, մեկ անձ ձերբակալվել է։

Հոգեբանական գիտությունների թեկնածու Կարինե Նալչաջյանը «Փաստինֆո»-ի հետ զրույցում ասաց, որ ծանր պատերազմի ազդեցության տակ մարդիկ, կարծես թե, ավելի իմաստնացան, ավելի խորը սկսեցին հասկանալ, թե ինչն է ավելի կարևոր, ինչը՝ երկրորդական և ցավալի պառակտումը՝ «սև-սպիտակի», «սև հագուստով» մարդկանց, սատանայի, որին պետք էր փնտրել և գտնել, ինչն իր պտուղները տվել էր, կարծես թե վերացավ և մենք ի մի եկանք։ Նրա խոսքով՝ դա հոգեբանական օրինաչափություն է, երբ որևէ կենսահոգեբանական խումբը հայտնվում է թշնամու սպառնալիքի տակ կամ դրսից հարվածներ է ստանում, խումբը սկսում է ներսից ինքնակազմակերպվել, ամրապնդվել և պատնեշ ստեղծել՝ արտաքին ոչնչացնող ուժի նկատմամբ։

«Սա շատ բնական բան է, ինչը մեզ հետ տեղի ունեցավ։ Ընդ որում՝ մեր ազգին բնորոշ բան է՝ ծայրահեղությունը զգալը, ամեն բջիջով զգում ենք վտանգի մեծությունը և միանգամից համախմբվում ենք»,- նշեց նա՝ հավելելով՝ այսօր որ կողմ նայում ենք՝ մարդիկ պատրաստ են ինքնազոհողության, միայն թե թշնամուն հաղթենք և, մենք արյան գնով, ճիգեր գործադրելով , պահում ենք հայրենիքը։

Նալչաջյանը նշեց, որ անընդունելի է նման իրավիճակում արհեստական դիմակայություններ մտցնելը, սակայն մյուս կողմից տարբեր օղակներ են առաջանում՝ թշնամիների ներխուժման համար, ուստի, պետք է շատ զգույշ լինել։

«Ինչ-որ ուժեր, ոչ միայն Թուրքիան և Ադրբեջանը, շատ հաճույքով միավորվում են մեր դեմ և դրսից եկող սպառնալիքը, որ ահաբեկիչներ, դավաճաններ չսողոսկեն, պետք է շատ աչալուրջ լինենք»,-նշեց նա՝ հավելելով, որ մամուլում տեղեկություններ են տարածվել, որի համաձայն՝ մեր ռազմական գաղտնիքները նվիրաբերվել են ուժերի, որոնք մեզ ոչնչացնել են ուզում։

«Պետք է շատ զգույշ լինել, մանավանդ, այն պայմաններում, երբ այդ «սորոսականությունը» ներծծվել է մեր մեջ»,- նշեց Նալչաջյանը՝ ընդգծելով, որ պետք է հստակ տարանջատել. «Ինչ-որ մարդկանց զրպարտենք և համարենք, որ իրենք դավաճան են, լրտես են... Պետք է ուշադիր լինենք, որ իրենց գործը կատարող նվիրյալ մարդկանց, անմեղ մարդկանց նկատմամբ հետապնդումներ հանկարծ չիրականացվեն»։

Նրա խոսքով՝ այսօր այդ տեսակետից շատ փխրուն վիճակ է, ճշգրիտ աշխատանքի կարիք կա։ Հոգեբանը չբացառեց, որ նման հայտարարություններն ազդեցություն չեն ունենա, սակայն արձանագրեց, որ, սկզբնական շրջանում վստահությունը մեծ էր և վերևից ասվող ամեն բան հալած յուղի տեղ ընդունվում էր, մինչդեռ, այսօր պատկերն այլ է՝ հոգեբանական ֆոնը փոխված է, վստահությունն այլևս այն չէ։

«Մահացու վտանգ է, եթե ուղղակի այդ ֆոնի վրա թիրախավորվեն անմեղ մարդիկ, ովքեր ուղղակի ինչ-որ մեկին դուր չեն գալիս, ինչ-որ մեկը վրեժ է ուզում լուծել, հին հաշիվներ ունեն»,- ընդգծեց մեր զրուցակիցը։

Անդրադառնալով պատերազմական դրությամբ պայմանավորված հանրության հուզական ֆոնին, հոգեբանն արձանագրեց, որ մեր ժողովրդին այդքան տխուր հիշում է երկրաշարժից հետո։

«Մարդկանց աչքերը միանգամից տխրեցին։ Մենք երիտասարդներ ենք կորցնում, մեր ժողովրդի սերուցքը գնաց և թիկունքում երկիր պառակտելը թշնամու ջրաղացին ջուր լցնել է »,- նշեց նա։

Ինչպես արդեն տեղեկացրել ենք՝ սեպտեմբերի 27-ի վաղ առավոտյան Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքիան, վարձկան-ահաբեկիչներ՝ Սմերչ, Պոլոնեզ, թուրքական Կասիրգա եւ այլ զինատեսակներով հրթիռակոծելով խաղաղ բնակավայրերը, այդ թվում մայրաքաղաք Ստեփանակերտը։ ՀՀ ԱԳՆ-ն հայտարարել է, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։Հայաստանում եւ Արցախում սեպտեմբերի 27-ին հայտարարվել է ռազմական դրություն և ընդհանուր զորահավաք։

Աղբյուր` Փաստինֆո