Փաստ ինֆո

Քրեական գործի քննության ընթացքում ձեռք չի բերվել որևէ ապացույց, որը կարող է վկայակոչել Գագիկ Ծառուկյանի կողմից գործի քննությանը խոչընդոտելու հանգամանքի վերաբերյալ։ Այս մասին լրագրողների հետ զրույցում ասաց Գագիկ Ծառուկյանի պաշտպան Սամվել Դիլբանդյանը։

«Եթե մենք քննարկում ենք խոչընդոտելու հանգամանքը, սա է դրված նրան ազատությունից զրկելու հիմքում, այդ հանգամանքը պետք է հաստատվի ոչ թե ապրիորի, վերացական դատողություններով, որ նա կարող է խոչընդոտել, քանի որ գործի քննության ակտիվ փուլն արդեն անցել է, նախաքննության արդեն երկրորդ ժամկետն է երկարացվում, հազարավոր մարդիկ են հարցաքննվել, տասնյակներով խուզարկություններ են եղել, տեղի է ունեցել տարբեր բնույթի քննչական և դատավարական գործողություններ։ Եթե խոսում ենք խոչընդոտելու մասին, պետք է հաշվի առնենք հետևյալ հանգամանքները՝ կա արդյոք դատավարության մասնակիցների նկատմամբ որևէ ազդեցություն։ Նման փաստական տվյալ դատական նիստի ընթացքում դատախազությունը և նախաքննության մարմինը չներկայացրեց, հակառակը, փաստեց, որ որևէ փաստական տվյալ չունեն, որ չորս ամիսների ընթացքում օգտագործվել է իր ֆինանսական կարողությունները »,- նշեց Դիլբանդյանը՝ պարզաբանելով, որ բոլոր ենթադրությունների հիմքում ընկած էր երկու փաստարկ՝ ֆինանսական հնարավորություններ և որպես կուսակցության ղեկավար անձնական կապեր ունենալը, սակայն այս ընթացքում որևէ գործողություն չի իրականացվել։

Դիլբանդյանն ընդգծեց, որ բացի կալանքից կա նաև համարժեք այլ խափանման միջոցներ, ինչի վերաբերյալ դատական նիստի ընթացքում բարձրաձայնել են, սակայն սա այն որոշումներից է, որով դատական իշխանության ձեռքով քաղաքական հետապնդում է իրականացվում մեր երկրում, ինչը ցավալի է։

Աղբյուր` Փաստինֆո