Փաստ ինֆո

Խորհրդարանը քիչ առաջ 88 կողմ, 0 դեմ, 0 ձեռնպահ ձայների հարաբերակցությամբ երկրորդ ընթերցմամբ և ամբողջությամբ ընդունեց կառավարության կողմից ներկայացված «ՀՀ հարկային օրենսգրքում փոփոխություն կատարելու մասին» օրենքի նախագիծը։

Նպատակն է ստեղծել հնարավորություն, որպեսզի առեւտրային բանկերը եւ վարկային կազմակերպությունները, առանց լրացուցիչ հարկային պարտավորություններ կրելու, ֆիզիկական անձանց կարողանան ներել մինչեւ 2020 թվականի օգոստոսի 31-ը անհուսալի ճանաչված վարկերի գծով հաշվարկված տույժերն ու տուգանքները:

89 Կողմ, 0 դեմ, 0 ձեռնպահ ձայների հարաբերակցությամբ ամբողջությամբ ընդունվեց «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացում կատարելու մասին» օրենքի նախագիծը։

Հիշեցնենք, որ օրինագծով սոցիալական փաթեթի շրջանակում հատկացվող գումարները պետական պաշտոն եւ պետական ծառայության պաշտոն զբաղեցնող անձանց հայեցողությամբ կարող են փոխանցվել նաեւ այն հիմնադրամներին, որոնց գործունեությունն ուղղված է ՀՀ կայուն ու համաչափ զարգացում ապահովվող ծրագրերի իրականացմանը, տնտեսության կայունացման օժանդակմանը կամ այլ համապետական ծրագրերի իրականացմանը: ՀՀ կառավարության որոշմամբ սահմանվելու են այն հիմնադրամները, որոնց կթույլատրվի փոխանցումներ կատարել:

89 կողմ, 0 դեմ, 0 ձեռնպահ ձայների հարաբերակցությամբ ընդունեց 2020թ. ՀՀ պետական բյուջեի մասին օրենքում փոփոխությունների նախագիծը, համաձայն որի ռազմական գործողություններով պայմանավորված 40 մլրդ դրամով ավելացվեցին ծախսերը:
«Այս փոփոխությունները հնարավորություն կտան համարժեքորեն արձագանքել խնդիրներին, որ ստիպված ենք եղել առերեսվել»,- ասաց ՀՀ ֆինանսների նախարար Ատոմ Ջանջուղազյանը:

Աղբյուր` Փաստինֆո