Փաստ ինֆո

Հայաստանում է Սանկտ Պետերբուրգի Պոլեովի անվան նյարդավիրաբուժության ինստիտուտի մանկական ծառայության ղեկավար, բ.գ.դ. պրոֆեսոր, նյարդավիրաբույժ Վիլյամ Խաչատրյանը ։ Նա Հայաստան է ժամանել արցախա-ադրբեջանական շփման գծի ողջ երկայնքով վերջին օրերին թշնամու սանձազերծած ռազմական ագրեսիայի հետևանքով տուժած և տարբեր աստիճանի վիրավորումներ ստացած քաղաքացիներին և զինծառայողներին իր մասնագիտական ծառայությունները օգտակար դարձնելու համար։ 

«Փաստինֆո»-ի հետ զրույցում հայտնի նյարդավիրաբույժը նկատում է՝ այսօր է հասել հայրենիք և արդեն իսկ եղել է Սյունիքում՝ Գորիսում, տեղում ծանոթացել առկա վիճակին։ Ասում է՝ ավելի բարդ իրավիճակ էր սպասում տեսնել, բայց իրականությունն ավելի հուսադրող էր.«Ինչպես գիտենք հիմա բժիշկների կարիք կա։ Կարծում եմ, որ հիմա ես պետք է այստեղ լինեմ, կարծում էի, որ հնարավորինս շուտ պետք է գալ։ Գիտեմ, որ Մոսկվայի և Պետերբուրգի իմ մյուս կոլեգաներն էլ պատրաստվում են ամենամոտակա չվերթներով այցելել Հայաստան։ Ամեն մեկն ուզում է ինչով կարող է օգտակար լինել Հայաստանին։ Բժիշկների դերն իներտ է, չեզոք, նրանք միշտ էլ հումանիտար առաքելություն են իրականացրել։ Բժիշկը նրա համար է, որպեսզի օգնի մարդկանց, անկախ հանգամանքներից ու իրավիճակներից։ Պարզ է, որ վիրավորներ կան և բժշկական օգնության կարիք կա, թեև պետք է ասեմ, որ մինչ իմ այստեղ գալն էլ իմ հայաստանյան կոլեգաները հիանալի են կատարել իրենց մասնագիտական պարտականությունները, տեղյակ եմ, որ այս օրերին թե՛ Հայաստանում, թե՛ Արցախում աշխատող բժշկական անձնակազմերից բոլորը գոհ են, նրանք առանց կողմնակի օգնության էլ կկարողանային պրոֆեսիոնալ կերպով դուրս գալ այս իրավիճակից, թեև կողմնակի օգնությունը չի խանգարի»։

Սա Սանկտ Պետերբուրգի Պոլեովի անվան նյարդավիրաբուժության ինստիտուտի մանկական ծառայության ղեկավար, բ.գ.դ. պրոֆեսոր, նյարդավիրաբույժ Վիլյամ Խաչատրյանն առաջին այցը չէ հայրենիք։ Նա այստեղ էր նաև Գյումրու ողբերգական դեպքերից անմիջապես հետո, բազմաթիվ անգամներ այցելել է նաև մասնավոր դեպքերում մասնագիտական իր օգնությունը ցուցաբերելու համար։

Այս պահին իր բժշկական ծառայությունները հանրահայտ նյարդավիրաբույժը կիրականացնի այստեղ՝ Հայաստանի Հանրապետությունում, իսկ հետագա անելիքները կորոշվեն իրավիճակին համապատասխան։ Պատերազմական արտակարգ իրավիճակներում աշխատող իր կոլեգաներին Վիլյամ Խաչատրյանը խորհուրդ է տալիս՝ երիտասարդ կադրերին հատկապես հիմա աշխատել փորձառու մասնագետների հետ միասին, իրենց առողջ էնտուզիազմին գումարելու համար ավագ սերնդի՝ տարիների փորձը, իսկ ինչ վերաբերում է արդեն փորձառու իմ կոլեգաներին՝ ես գիտեմ, որ նրանք անվախ են, միշտ ամենաթեժ ու վտանգավոր տեղերում են՝ չխնայելով իրենց, աշխատում են հարյուրավոր կյանքեր փրկելու համար։

Հետևաբար՝ ուզում եմ նրանց ասել, որ չմոռանան նաև իրենք իրենց պաշտպանելու մասին։

Հեղինակ՝ Նվարդ Մանվելյան

Աղբյուր` Փաստինֆո