Փաստ ինֆո

Այս պահին դիվանագիտական ճակատում հայկական կողմն ունի երկու խաղաքարտ՝ Թուրքիան ահաբեկիչներ է բերել և պատերազմ հրահրել,- «Փաստինֆո»,-ի հետ զրույցում ասաց թուրքագետ Անդրանիկ Իսպիրյան։

Ինչպես արդեն տեղեկացրել ենք՝ Ադրբեջանի հետ Արցախի սահմանագծի ամբողջ երկայնքով սեպտեմբերի 27-ից ընթանում են դաժան մարտեր։ Ադրբեջանաթուրքական տանդեմը մարտական գործողությունների ընթացքում թիրախավորում է նաեւ խաղաղ բնակչության, քաղաքացիական ենթակառուցվածքները՝ հանգեցնելով հումանիստական աղետի։ Ավելին՝ ընդդեմ բնակչության օգտագործվել են արգելված զինատեսակներ՝ կասետային հրթիռներ։

Իսկ երեկ աշխատանքային այցով Բաքու էր մեկնել Թուրքիայի ԱԳ նախարար Մևլյութ Չավուշօղլուն: Վերջինս հանդիպումներ է ունեցել Ադրբեջանի նախագահի, ինչպես նաև ԱԳ նախարար Ջեյհուն Բայրամովի հետ և քննարկել դրությունը Արցախում:

Թուրքական TRT հեռուստաալիքին տված հարցազրույցում Թուրքիայի ԱԳ նախարարը հայտարարել էր, թե Թուրքիան ուզում է դառնալ ԵԱՀԿ Մինսկի խմբի համանախագահ՝ այպիսով ակտիվացնելով իր գործունեությունը ղարաբաղյան հակամարտության կարգավորման գործում:

Մեզ հետ զրույցում թուրքագետ Անդրանիկ Իսպիրյանը Թուրքիայի այս ցանկությունը որակեց աբսուրդ, վստահեցնելով, որ ոչ մի դեպքում Թուրքիան չի կարող միջնորդ հանդիսանալ ղարաբաղյան հարցի կարգավորման գործում.

«Նախ ասեմ, որ Չավուշօղլին չի ասել՝Թուրքիան ուզում է դառնալ ԵԱՀԿ Մինսկի-ի համանախագահ, դա ադրբեջանական մամուլից է տարածվել։ Ավելին՝ Թուրքիան պատերազմի առաջին օրերի համեմատ փոքր-ինչ փոխել է իր դիրքորոշումը, եթե սկզբում ասում էին, որ Մինսկի խումբը չի կարողանում այլևս լուծել խնդիրը, և Ադրբեջանը ինքը պիտի լուծի: Երեկվա հարցազրույցը թեև Բաքվում էր և ակնկալվում էին ադրբեջանահաճո հայտարարություններ, սակայն Չավուշօղլին կարևորեց Մինսկի խմբի դերակատարումը հակամարտության կարգավորման գործում, հատկապես՝ Ռուսաստանի դերը՝ նշելով որ Ռուսաստանը արել է ամեն բան ղարաբաղյան հարցի կարգավորման համար, սակայն Թուրքիան էլ է ցանկանում միջնորդ լինել Մինսկի խմբում ՝ երկկողմ կամ եռակողմ ֆորմատով»,-նշեց Անդրանիկ Իսպիրյանը:

Բանախոսի հավաստմամբ՝ Թուրքիայի՝ Ադրբեջանին բացահայտ աջակցելու մասին հայտարարություններն էլ վկայում են, որ Թուրքիայի մասնակցությունը Արցախյան հիմնախնդրի կարգավորման գործում պետք է բացառվի.

«Երեկվա հարցազրույցում Թուրքիայի ԱԳ նախարարը հայտարարեց միջնորդ դառնալու ցանկության մասին, իսկ արդեն հաջորդ նախադասության մեջ շեշտեց, որ Թուրքիան մինչև վերջ պատրաստ է աջակցել Ադրբեջանին:Ինչպես կարող է միջնորդ լինել մեկը, ով աջակցում է Ադրբեջանին, երբ օրինակ այս պահին Հայաստանի դաշնակից Ռուսաստանը չի ասում ես աջակցում եմ Հայաստանին, քանի որ նա հասկանում է, որ եթե հանդիսանում է միջնորդ, ապա չի կարող բացահայտ աջակցություն հայտնել, այլապես կկորցնի միջնորդ լինելու ֆունկցիան»:

Մեր զրուցակիցը նկատեց, որ Ադրբեջանի իշխանությունը այժմ գերի է Թուրքիայի ձեռքին, ինչպես նաև ակնհայտ է Ալիևի վրա Թուրքիայի նախագահ Էրդողանի ազդեցությունը,վերջինս էլ,օգտվելով այս հանգամանքներից, օգտագործում է Ադրբեջանին՝ ընդդեմ Հայաստանի.

«Ալիևը հայտարարել է, որ Թուրքիան պետք է մասնակցի բանակցություններին, այսինքն Թուրքիան կարողացել է Ալիևին իր բռի մեջ հավաքել, և օգտագործել Հայաստանի դեմ: Ալիևն էլ կրակն է ընկեր թուրքական իշխանությունների ձեռքին, փակուղում է հայտնվել՝ իր զորքը կորուստներ է կորում դիվանագիտական ճակատում չունեն որևէ հաջողություն»:

Թուրքագետը դիվանագիտական ճակատում հայկական կողմի հաղթանակը պայմանավորող երկու կարևոր գործոն առանձնացրեց՝ Թուրքիան պատերազմ է հրահրել և ահաբեկիչներ բերել տարածաշրջան.

«Այս պահին դիվանագիտական ճակատում գլխավոր խաղաքարտը հայկական կողմի ձեռքում է՝ Թուրքիան բերել է ահաբեկիչներ: Ահաբեկիչներ բառը արդեն իսկ վատ է անդրադառնում Ադրբեջանի և Թուրքիայի հեղինակության վրա, ինչպես նաև ակնհայտ է, որ այս պատերազմը Թուրքիան է հրահրել: Ցավոք դեռ պետությունների մակարդակով քիչ պետություններ կան, որ փորձել են ազդել Թուրքիայի վրա՝ Կանադան է, որ արգելեց ԱԹՍ-ների վաճառքը Թուրքիային, Մակրոնի հայտարարությունները և ,իհարկե, Հոլանդիան, որտեղ խորհրդարանի մակարդակով Թուրքիայի դեմ բանաձև է ընդունվել»,- վստահեցրեց բանախոսը:

Աղբյուր` Փաստինֆո