Փաստ ինֆո

Տեսնում ենք, որ Իրանը դիմում է որոշակի քայլերի, և դրանք չեն սահմանափակվում միայն հայտարարություններով: Այս մասին այսօր տեղի ունեցած ճեպազրույցների ընթացքում ասել է ՊՆ ներկայացուցիչ Արծրուն Հովհաննիսյանը:

Անդրադառնալով առաջնագծում տիրող իրավիճակին՝ Հովհաննիսյանը ևս մեկ անգամ նշեց, որ մարտերը բավականին ինտենսիվացել են, հատկապես՝ կեսօրից հետո: Միաժամանակ նա նկատել է, որ  մեր զորքերն ինչպես հաճախ, միայն պաշտպանական մարտեր չեն վարում, այլև՝ իրականացվում է նաև այլ տիպի զորաշարժեր, որոնց բնույթը և հաջողություններն ու արդյունքներն արձանագրվում են ավելի ուշ:

Ինչ վերաբերում է սոցիալական ցանցերում տարածված տեղեկություններին, որի համաձայն՝ հայկական կողմը հերթական ռազմավարական օբյեկտն է շարքից հանել, Հովհաննիսյանը նշեց, որ չկա օր, որ մեր զինված ուժերն ադրբեջանական որևէ օբյեկտ շարքից չհանեն, ուղղակի միշտ չէ, որ այդ օբյեկտները ռազմավարական են եւ կամ գործողությունը ենթակա է լուսաբանման։ «Պատերազմը լայնածավալ է, սաստիկ է, ծանր մարտեր են լինում, հաջողություններ կամ անհաջողություններ են լինում, եթե նպատակահարմար համարենք լուսաբանել, կներկայացնենք։ Հետեւեք մեր հրամանատարներին, զորքին, որոնք օր ու գիշեր հերոսություններ են անում, որ նույնիսկ չենք հասցնում ներկայացնել»,- նշեց Հովհաննիսյանը։

Նա նաև տեղեկացրեց, որ շարունակում են անդադար զանգեր ստանալ, օգնության առաջարկներ ներկայացնել, ե՛ւ դրամական միջոցներով, ե՛ւ պարենով ու ընդգծեց, որ  այդ միջոցները կարող են ուղղել «Հայաստան» համահայկական հիմնադրամին եւ Զինծառայողների ապահովագրության հիմնադրամին։

Աղբյուր` Փաստինֆո