Փաստ ինֆո

Մենք կարողացանք թուրք-ադրբեջանական ագրեսիային դիմակայել, արժանի հակահարված տալ, պետք է փորձենք նույնն անել նաև դիվանագիտական ճակատում և դրանից օգուտ քաղել,- «Փաստինֆո»-ի հետ զրույցում ասել է քաղաքագետ Ռուբեն Սաֆրաստյանը։

Ինչպես արդեն տեղեկացրել ենք՝ սեպտեմբերի 27-ի վաղ առավոտյան Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին ակտիվ ներգրավված են նաեւ Թուրքիան, վարձկան-ահաբեկիչներ: ՀՀ ԱԳՆ-ն հայտարարել է, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների։

Արդեն 10 օր է, ինչ համառ մարտեր են ընթանում Արցախում, առաջնագծում կրած զգալի կորուստներից հետո ադրբեջանաթուրքական տանդեմը թիրախավորել է խաղաղ բնակչությանն ու քաղաքացիական ենթակառուցվածքները։ Վերջին օրերին միջազգային հանրության կողմից արդեն սկսել են հնչել խաղաղ բնակչության թիրախավորումը դատապարտող հայտարարություններ։

Քաղաքագետի գնահատմամբ՝ ներկայումս բանակցային գործընթացը սկսելու շանս կա։

«Ռազմական գործողությունների սկզբնական փուլում թեև ադրբեջանաթուրքական տանդեմի ագրեսիան չէր ստանում արժանի արձագանք միջազգային հանրության կողմից, սակայն վերջին օրերին դիվանագիտական ճակատում այս առումով նկատվում է դրական տեղաշարժ»,- «Փաստինֆո»-ին ասաց Ռ.Սաֆրաստյանը՝ նկատելով, որ թեեւ ռազմական գործողությունները դեռևս շարունակվում են, այնուամենայնիվ, ռազմաճակատում մեր մարտիկների գրանցած հաջողությունն այլևս անհերքելի փաստ է:
Քաղաքագետ Ռուբեն Սաֆրաստյանի դիտարկմամբ՝ ռազմաճակատում գրանցած հաջողություններին համարժեք դիվանագիտական հաղթանակ կլինի Արցախի Հանրապետության միջազգային ճանաչումը.

«Եթե մեր դիվանագիտությունը կարողանա հասնել նրան, որ սկսվի Արցախի Հանրապետության ճանաչման գործընթաց, դա կլինի իսկապես հաղթանակ, բայց դրան շատ դժվար է հասնել: Պետք է տարբեր պետություններ ճանաչեն Արցախի անկախությունը, նոր միայն ՄԱԿ-ը կճանաչի:Մենք կարողացանք թուրք-ադրբեջանական ագրեսիային դիմակայել, արժանի հակահարված տալ, պետք է փորձենք նույնը անել նաև դիվանագիտական ճակատում և դրանից օգուտ քաղել»:

Քաղաքագետը մեզ հետ զրույցում կարևորեց հատկապես մեր ռազմաքաղաքական դաշնակցի՝ Ռուսաստանի, ինչպես նաև Մինսկի խմբի համանախագահների հետ տարվող բանակցությունները.

«Դիվանագիտական հարթակում շատ կարևոր է հատկապես Ռուսաստանի, ինչպես նաև Մինսկի խմբի համանախագահների գործոնը: Մինսկի խմբի համանախագահների երեկվա հայտարարությունը ավելի կտրուկ էր և վճռական:Կարծում եմ՝ Թուրքիայի հանդեպ այժմ մեծ ճնշում է գործադրվում, օրինակ` երեկ Կանադան արգելեց ԱԹՍ-ների վաճառքը Թուրքիային: Ես կարծում եմ, որ մեր դիվանագիտությունը շատ ինտենսիվ աշխատում է այս ուղղությամբ, և մեզ հաջողվեց աշխարհին ներկայացնել իրադրությունը:Կարողացանք Թուրքային, որը հայտնի է կեղծիքներ տարածելու հակումով, հաղթել ինֆորմացիոն պատերազմում»,-վստահեցրեց Ռուբեն Սաֆրաստյանը:

Քաղաքագետի հավաստմամբ՝ այս պահին ոչ պակաս կարևոր է նաև հայկական սփյուռքի կատարած աշխատանքը.

«Հայաստան-Արցախ-Սփյուռք պետք է դառնան մեկ միասնություն, Հայաստանն էլ նրանց կոորդինացնող ուժ: Տեսնում եմ, որ տարբեր երկրներում մեր քաղաքացիները մեծ աշխատանք են տանում, խնդիրներ լուծում: Պետք է չդադարեցնեն իրենց գործունեությունը, նույն կերպ շարունակեն»,-եզրափակեց զրուցակիցը:

Աղբյուր` Փաստինֆո