Փաստ ինֆո

Միջազգային հանրությունը շատ հստակ փաստեց, որ Ադրբեջանը և Թուրքիան օգտագործում են ահաբեկչական կազմակերպություններ։ Այս մասին լրագրողների հետ զրույցում ասաց ԱԺ «Բարգավաճ Հայաստան» խմբակցության քարտուղար Արման Աբովյանը։

«Վերջին երեք-չորս օրվա ընթացքում միջազգային հանրության հռետորաբանությունը և մատնանշումը կամաց-կամաց գնում է դեպի ճշմարտություն և արդարություն։ Արդեն իսկ Ֆրանսիայի նախագահ Մակրոնի շուրթերով, ՌԴ արտգործնախարարության, ԱՄՆ դեպարտամենտի և պենտագոնի տեղեկություններով՝ հաստատվել է, որ Ադրբեջանը և Թուրքիան փաստացի օգտագործում են տեռորիստական կազմակերպությունները»,- նշեց Աբովյանը։

Նրա խոսքով՝ այժմ գերագույն խնդիրն այն է, որ միջազգային հանրությունը հստակ մատնանշի, որ Ադրբեջանը և Թուրքիան տեռորիստական պետություններ են, որոնք ագրեսիա են կատարում Արցախի Հանրապետության և Հայաստանի Հանրապետության դեմ։ Բացի դա՝ Եվրոպառլամենտի պատգամավորներն արդեն իսկ ներքին կարգով քննարկումներ են իրականացնում՝ Թուրքիայի հանդեպ պատժամիջոցներ կիրառելու համար, իսկ Կանադան արդեն մասնակիորեն որոշակի քայլերի է դիմել։

«Սա առայժմ այն սիմվոլիզմն է, որը թույլ է տալիս մեզ հուսալ, որ միջազգային հանրությունն ի վերջո կգա այն եզրակացությանը, ինչը կա»,-ասաց Աբովյանը՝ հավելելով, որ այժմ դեռևս քիչ է խոսվում այն մասին, որ այսօր փաստացի Ադրբեջանը որպես պետություն գոյություն չունի, գոյություն ունի վիլայեթ՝ Ադրբեջան անունով, որի ղեկավարումն իրականացնում է Թուրքիան։

Պատգամավորն ընդգծեց, որ Ստեփանակերտը ռմբակոծվում է բոլոր հնարավոր և անհնարին կոնվենցիաներով արգելված կասետային ռումբերով և հրթիռներով, ինչն ինքին արդեն ռազմական հանցագործություն է։

«Ալիևը և Էրդողանը ռազմական հանցագործ են»,- ասաց Աբովյանը՝ նշելով, որ պետք է ապացույցների բազա հավաքել և աշխարհին ցույց տալ, որ վերջիններս խնդիր ունեն մեզ ոչնչացնելու, ոչ թե՝ տարածքային ամբողջականության խնդիր լուծելու, ընդ որում՝ նման խնդիր կանգնած չէ նրանց առջև։

Աղբյուր` Փաստինֆո