Փաստ ինֆո

ՀՀ վարչապետ Նիկոլ Փաշինյանի որդին՝ հոր մարտակոչից հետո, այսօր լուսանկար է հրապարակվել կամավորագրվելու մասին, թեեւ մոտ մեկ շաբաթ առաջ նրա մայրը հայտարարել էր, թե Աշոտ Փաշինյանը պահեստային զորքերի մեջ է։

«Արցախ գալու ճանապարհին իմ ամուսինն ինձ ասել է, որ մեր տղան պետք է գնա մասնակցի էս բանին, այսինքն, պահեստային զորքերի բանի մեջ է։ Ինքը հագնվել է, ես իրան ասել եմ՝ հա տղա ջան, զինվորական հագուստդ հագի ու գնա։ Եվ ես իրան ասել եմ՝ դու մի բան իմացի՝ ես քեզ պաշտում եմ, բայց հայրենիքի համար զոհվելուց ավելի վեհ բան այս աշխարհում չկա։ Ես մեքենայի մեջ, Ստեփանակերտ գալու ճանապարհին իմ որդուն ասել եմ դա, որովհետև չգիտեի ինչ վիճակա։ Ասել եմ՝ կարողա կապ չունենանք, կարողա կտրվի մեր մեջ կապը, ես չգիտեմ դու ուր կգնաս։ Ես եկել եմ Ստեփանակերտ էն մտքով, որ կարողա չկարողանամ վերադառնալ Երևան մի որոշ ժամանակով ու կարողա իմ տղայի հետ հեռախոսային կապ չունենամ»։

Այս խոսքերը վարչապետի տիկին Աննա Հակոբյանն ասել է արցախա – ադրբեջանական շփման գծի ողջ երկայնքով թշնամու սանձազերծած ռազմական ագրեսիա մեկնարկի առաջին օրերին, երբ մեկնել էր Ստեփանակերտ։

Հիշեցնենք՝ Ա.Հակոբյանն Արցախ է մեկնել հենց սեպտեմբերի 27-ին՝ ադրբեջանաթուրքական տանդեմի ռազմական ագրեսիայի առաջին օրը։

Սրանից մի քանի օր անց՝ հոկտեմբերի 3-ին Աննա Հակոբյանը կրկին Ստեփանակերտում էր, այս անգամ, արդեն որդու՝ Աշոտ Փաշինյանի հետ։ Նկատենք, որ Աննա Հակոբյանին ուղեկցող Աշոտ Փաշինյանը Ստեփանակերտի փողոցներում շրջում էր քաղաքացիական հագուստով, այն է՝ տղան ակնհայտորեն զինվորական ծառայության մեջ չէր։

Արդեն այսօր ՀՀ վարչապետ Նիկոլ Փաշինյանը ֆեյսբուքյան ուղիղ միացմամբ դիմեց վերջերս զորացրված երիտասարդներին՝ զինվորագրվել և մեկնել ռազմաճակատ, իրենց պարտքը տալու ծանր վիճակում հայտնված հայրենիքին։ Մարտակոչից մի քանի րոպե անց համացանցում են հայտնվում վարչապետի որդու՝ Աշոտ Փաշինյանի զինվորական հագուստով լուսանկարները, իսկ լուսանկարին կից զետեղված է Աշոտ Փաշինյանի կողմից արված ֆեյսբուքյան գրառումը.« Հենց նոր կամավորագրվեցի կենտրոնական հավաքակայանում: Համածառայակից ընկերներ ջան, եկելա մեր հերթը մատուցելու հայրենիքին մեր ծառայությունները»:

Այդպես էլ պարզ չդարձավ, թե երբ է վարչապետի որդին առաջնագիծ մեկնելու համար հայտ ներկայացրել՝ սեպտեմբերի 27, թե հոկտեմբերի 5-ին։ Ստացվում է, որ վարչապետի որդուն հոր հորդորը կատարելու համար մեկ շաբաթ է անհրաժեշտ, եթե, իհարկե, ժամեր անց չպարզվի, որ սա նույնպես Փաշինյանների ընտանիքին հատուկ հերթական ապատեղեկատվությունը չէր»։

Այս օրերին մամուլը շատ երեւույթների մասին չի խոսում, լռում է՝ գիտակցելով երկրի առջեւ ծառացած լուրջ վիճակը, մատնացույց չի անում առկա բացթողումները, ընդհուպ պաշտոնյաների կողմից հնչեցվող հայտարարություններում առկա վտանգավոր երանգները, ռազմական գաղտնիք պարունակող տվյալների հանրայնացումը, բայց կարծում ենք վարչապետի ընտանիքը եւս պետք է գիտակցի պահի լրջությունը էժանագին քարոզչության գործիք չդարձնի իր զավակներին։ Ի վերջո, հարյուրավոր մայրեր այս օրերին կորցրել են իրենց զավակներին, կանայք՝ ամուսիններին, աղջիկներ՝ եղբայրներին ու սիրած տղաներին։

Աղբյուր` Փաստինֆո