Փաստ ինֆո

«Հպարտ գնացեք»-ից հետո, որ կատարյալ կերպով իր մեջ ներառել էր 90-ականների արցախյան ազատագրական պայքարի ողջ մարտական ոգին, Գուսան Հայկազունն այս օրերին ռազմահայրենասիրական նոր երգ է հեղինակել։

Այս մասին «Փաստինֆո»-ին պատմում է ինքը՝ հեղինակը.«Եթե 90-ականներին ծնված «Հպարտ գնացեք»-ը քաջարի հայ մարտիկների ոգին բարձրացնելու համար էր ստեղծվել՝ սպարապետ Վազգեն Սարգսյանի անմիջական հավանությամբ, ապա այս անգամ նոր գրված երգն ուղղում եմ Ադրբեջանում ապրող ազգային փոքրամասնություններին՝ թալիշներին, ուդերին, եզդիներին, կոչ անելով թոթափել մարդասպան Ադրբեջանի լուծն ու անմիջապես միանամ հայկական կողմից, այսպիսով՝ ազատագրելով իրենց ու տարածաշրջանը ագրեսոր Ադրբեջանի նախաձեռնած ռազմական ագրեսիաներից»։ 

Անդրադառնալով սիրված ու հատկապես այսպիսի օրերին մեծ մասսայականություն վայելող հայտնի՝ «Հպարտ գնացեք» երգի ստեղծման պատմությանը, Գուսան Հայկազունը պատմում է՝ երգը ստեղծվել է մի շնչով, արցախյան գոյամարտի ընթացքում. «Երբ քաջի մահով ընկավ Դուշման Վարդանը, ճակատը մի պահ հուսահատվեց, կորավ հաղթանակի հանդեպ եղած հույսը: Հենց այդ դաժան օրերին ես գրեցի «Հպարտ գնացե՛ք» երգը, որը նոր լիցք հաղորդեց հոգնած, բայց չվհատված, տանջված, բայց չսպառված մեր հայ մարտիկին: Հիմա ես նայում եմ այսօր մարտի ելած մեր նոր սերնդի քաջ արծիվներին ու հասկանում եմ, որ հայը պարտվել չունի, մեր գենի մեջ չկա, բացակայում է պարտություն ասվածը։ Ինչպես 1994 թվականի մայիսի 12-ին պատերազմն ավարտվեց հայոց քաջարի բանակի փայլուն հաղթանակով, նույնը կրկնվելու է նաև հիմա, այսօր, մեր օրերում։ Հավերժ փա՜ռք մեր ընկած քաջարի մարտիկներին, բազկի ուժ ու Աստծո օրհնություն նրանց, ովքեր օրեր շարունակ արյուն քրտինք տված պայքարում են ռազմի դաշտում, որ մենք փառքով գրենք մեր պատմության հերթական հաղթական էջը։ Հաղթելո՛ւ ենք»,-ասում է Գուսան Հայկազունը «Փաստինֆո»-ի հետ զրույցում։

Հեղինակ՝ Նվարդ Մանվելյան

Աղբյուր` Փաստինֆո