Փաստ ինֆո

«Ադրբեջանը հատել է բոլոր կարմիր գծերը, օր առաջ պետք է հարված հասցնել այդ պետության էներգետիկ անվտանգության կարևորագույն օբյեկտներին և առաջին հերթին նավթի և գազի խողովակաշարերին՝ Բաքու – Ջեյհան և Բաքու – Էրզրում խողովակաշարերին, որոնք իսկապես ռազմավարական նշանակություն ունեն այդ պետության համար,- «Փաստինֆո»-ի հետ զրույցում ասել է միջազգային անվտանգության մասնագետ Արմեն Մանվելյանը՝ վերլուծելով վերջին օրերին արցախա-ադրբեջանական սահմանին թշնամու կողմից սանձազերծված լայնամասշտաբ պատերազմական գործողությունները, որի ընթացքում ադրբեջանական կողմը խախտելով բոլոր տեսակի միջազգային կոնվենցիաները՝ ռազմական հանցագործության գնալով թիրախավորում է խաղաղ բնակավայրերն ու քաղաքացիական օբյեկտները, ինչի արդյունքում արդեն իսկ հայկական կողմը շուրջ երկու տասնյակի հասնող քաղաքացիական զոհեր ունի։

«Ադրբեջան պետության ֆինանսական, տնտեսական, ռազմական և նույնիսկ կլանային համակարգի գոյությունը պայմանավորված է բացառապես Բաքու –Ջեյհանի աշխատանքով։ Չլիներ այդ նավթամուղն ու չլիներ նավթի վաճառքի հնարավորությունն, այդ պետությունը գոյություն չէր ունենա։ Եվ քանի դեռ աշխարհում կա նավթի պահանջարկ, այդ պետության կարիքը դեռ կա։ Հետևաբար, թիրախավորել հենց այդ կառույցները հատկապես հիմա շատ կարևոր է, առավել ևս, որ նորից եմ կրկնվում՝ կարմիր գծերն արդեն հատվել են։ Ժամանակին Նորատ Տեր – Գրիգորյանն էր ասում՝ հենց Ադրբեջանն անցնում է Կուր – Արաքսի աջ ափը, անմիջապես պետք է թիրախավորվի։ Հետևաբար, աջ ափում գտնվող ցանկացած ադրբեջանական օբյեկտ պետք է թիրախ դառնա և ոչնչացվի»,- նշեց փորձագետը։

Արմեն Մանվելյանի դիտարկմամբ՝ ժամանակին քաղաքականության մեջ կարծիք կար, թե նավթամուղի և գազամուղի կարևորությունը որոշակիորեն զսպող գործիք է և, սրանով պայմանավորված, ադրբեջանական կողմը պատերազմ չի սկսի, որովհետև մեր կողմից այդ ենթակառուցվածքները կթիրախավորվեն. «Դե հիմա պատերազմն արդեն սկսված է, ո՞ւմ ենք մենք սպասում։ Երեկ էլ խոսակցություններ հնչեցին, թե կարող է հարվածեն Մինգեչաուրի ջերմակայանին, ինչը շատ ճիշտ քայլ է, այն պետք է արագ կերպով իրականացնել»,- նկատում է միջազգային անվտանգության մասնագետը։

Անդրադառնալով թեմային, որ ադրբեջանական կողմը ռազմական գործողությունների ընթացքում խաղաղ բնակչությանը թիրախավորում է կասետային զենքով, բանախոսն ընդգծում է՝ սա ռազմական հանցագործություն է, թեև վերջինս թերահավատ է, թե միջազգային ատյանները պատերազմական գործողություններից հետո ադրբեջանական կողմին կստիպեն պատասխանատվություն կրել այդօրինակ գործողությունների համար, ճիշտ այնպես, ինչպես թուրքական կողմը կարող է խուսափել պատասխանատվության ենթարկվել՝ արցախա – ադրբեջանական վերջին ռազմական ագրեսիային իր մասնակցության համար։

Խոսելով վերջին օրերին լայն շրջանառության մեջ դրված ադրբեջանական կողմի ապատեղեկատվական արշավի թեմայով, Արմեն Մանվելյանը նշում է՝ երեկ Արծրուն Հովհաննիսյանը շատ դիպուկ նկատեց, որ Ալիևը, հավանաբար, տեղեկատվական շրջափակման մեջ է հայտնվել կամ նրան սխալ են զեկուցում.«Իսկ ավելի ճիշտ, Ալիևը հասկանալով, որ իրավիճակը լիակատար ձախողման է գնում, իսկ ինքը ոչինչ փոխել չի կարող, հասկանալով, որ ամեն անցնող օրն իր համար պարտություն է, իր բնակչությանը ինչ – որ կերպ ոգևորելու համար այդպիսի հայտարարություններով է հանդես գալիս»։

Մանրամասները՝ տեսանյութում

Հեղինակ՝ Նվարդ Մանվելյան

Աղբյուր` Փաստինֆո