Փաստ ինֆո

Ադրբեջանի նախագահ Իլհամ Ալիևի հայտարարություններն իր մեջ միջազգային հանրությանն ուղղված մեսիջներ էր պարունակում առ այն, որ բանակցային գործընթացին վերադառնալու որևէ մոտիվացիա չունի,- «Փաստինֆո»-ի հետ զրույցում ասել է ադրբեջանագետ Անժելա Էլիբեգովան։

Նշենք, որ երեկ ու այսօր Ադրբեջանի նախագահ Իլհամ Ալիևը հնչեցրել է հայտարարություններ, որոնցից հետեւում է, որ մարտական գործողությունները դադարեցնել չի պատրաստվում։ Ավելին՝ վերջինս հայտարարել էր, որ 1992թ-ից բանակցություններ են ընթանում, սակայն որևէ որոշում չկա և ևս 30 տարի «սպասել» չեն պատրաստվում։ Ավելին՝ որպես զինադադարի, այսպես կոչված պայման, պայման նշել է հայկական զինված ուժերի դուրս բերումը Արցախից։

Ադրբեջանագետ Անժելա Էլիբեգովան գտնում է, որ դա մեսիջ էր միջազգային հանրությանը և Ալիևն ամբողջովին ցույց տվեց, որ բանակցային գործընթացին վերադառնալու որևէ մոտիվացիա չունի, ինչպեսև նախկինում բազմիցս ասել էր ռազմական ճանապարհն իր համար ընդունելի լուծում էր և այդ առումով որևէ անակնկալ չկար։

Այնուամենայնիվ, ադրբեջանագետը գտնում է, որ Ադրբեջանի հանդեպ պետք է կիրառվեն շատ լուրջ և տնտեսության համար զգայուն սանկցիաներ։

Ադրբեջանագետի խոսքով՝ այս պահի դրությամբ Ալիևը դեռ խուսափում է ֆիքսել, որ հարձակվող կողմն ինքն է, սակայն, ի տարբերություն առաջին օրերի, միջազգային հանրության համար իրավիճակը պարզ է, թե ով է հարձակվող կողմը, ով է մեղավորն այս էսկալացիայում և ով է բանակցային գործընթացում դեստրուկտիվ կողմը, այն է՝ Ադրբեջանը։ Բացի դա՝ Ադրբեջանն արդեն իսկ դեմ է գնում նաև համանախագահող պետությունների դիմ իր հայտարարությամբ, որ կանգ առնել չի պատրաստվում։ Էլիբեգովայի կարծիքով՝ պատերազմի ավարտից հետո Ադրբեջանը պետք է շատ հստակ՝ և դիվանագիտական. և քաղաքական ոլորտներում, պատժվի։

Ինչ վերաբերում է Ադրբեջանի ներսում տիրող իրավիճակին, մասնավորապես՝ ազգային փոքրամասնությունների շրջանում տրամադրություններին, ադրբեջանագետը նշեց, որ Ադրբեջանն այժմ գտնվում է տեղեկատվական վակուումի մեջ և օբյեկտիվ պատկերը ստանալը դժվար է, որովհետև սոցիալական ցանցերը փակ են և ընդդիմադիր կայքերը ևս դժվար հասանելի են։

Ավելի վաղ տեղեկացրել ենք, որ Ադրբեջանում զորակոչին ակտիվորեն ներգրավված են ազգային փոքրամասնությունները։ Վարդան Ոսկանյանը հայտնել էր, որ հատկապես երեկվանից ուժեղացել են ճնշումները թալիշների նկատմամբ՝ զորակոչից խուսափելու պատրվակով։

Ինչպես արդեն տեղեկացրել ենք՝ սեպտեմբերի 27-ի վաղ առավոտյան Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքիան, վարձկան-ահաբեկիչներ՝ Սմերչ, Պոլոնեզ, թուրքական Կասիրգա եւ այլ զինատեսակներով հրթիռակոծելով խաղաղ բնակավայրերը, այդ թվում մայրաքաղաք Ստեփանակերտը։ ՀՀ ԱԳՆ-ն հայտարարել է, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։

Հայաստանում եւ Արցախում սեպտեմբերի 27-ին հայտարարվել է ռազմական դրություն և ընդհանուր զորահավաք։

Աղբյուր` Փաստինֆո