Փաստ ինֆո

ԱՄՆ-ի հայերը կրկին բողոքի ցույցերով իրենց ձայնն են հասցնում ողջ աշխարհին՝ վերջ տալ Ադրբեջանի և Թուրքիայի ագրեսիային: Այսօր ամերիկահայերը իրենց բողոքի ձայնը առավել լսելի դարձնելու, Ամերիկայի քաղաքային իշխանությունների և տեղի ԶԼՄ-ների ուշադրությունը գրավելու համար, փակել են Լոս Անջելեսի ամենամեծ մայրուղին։

Փողոցում երթևեկությունը կաթվածահար էր եղել։ Ավտոմեքենաները կայանել են մայրուղու մեջտեղում և ծածանել Հայաստանի, Արցախի դրոշները: Fox 11 Los Angeles-ի օդային նկարահանումը ցույց էր տալիս՝ ինչպես էր երթևեկությունը մոտ մեկ ժամ կանգնած՝ ճանապարհային ոստիկանության հսկողությամբ: Հայ ցուցարարները խաղաղություն են ուզում։ Ցույցը լուսաբանում էին տեղի ամենամեծ լսարան ունեցող ԶԼՄ-ները, բացի CNN-ից։

Լոս Անջելեսում CNN-ի դիմաց հարյուրավոր հայեր կրկին մոբիլիզացվել և բողոքի ցույց են անում, երգում հայրենասիրական երգեր, ծածանում Հայաստանի և Արցախի դրոշները: Հնչում են «Պայքար, պայքար մինչև վերջ», «Մեջք մեջքի տալով պետք է հասնենք մեր նպատակին», «Կեցցե հայ ազգը» և նմանատիպ այլ կոչեր: Հավաքվածները հայրենասիրական ելույթներով են հանդես գալիս, վանկարկում՝ հաղթանակ: Հայերին միացել են նաև եզդի եղբայրական ժողովրդի ներկայացուցիչները: Լոս Անջելեսի հայերը ցանկանում են վերացնել լռությունը ճշմարտության նկատմամբ, նրանք CNN-ի ուշադրությունն են հրավիրում Ադրբեջանի և Թուրքիայի ագրեսիայի վրա՝ «CNN, որտեղ ես» պաստառով զարմանք արտահայտելով լրատվամիջոցի լռության առնչությամբ:

Արդեն հինգերորդ օրն է, ինչ հայ հմայնքի ներկայացուցիչները Լոս Անջելեսի տարբեր անկյուններում իրենց բողոքի ձայնն են բարձրացնում ընդդեմ ադրբեջանաթուրքական տանդեմի սանձազերծած ագրեսիայի։ Հայերը նախ ցույցեր կազմակերպեցին Գլենդեյլում, Բրբանքում, Բոստոնում։ Ապա հարյուրավոր քաղաքացիներ Ադրբեջանի դեսպանատան առջև են բողոքի ակցիա կազմակերպել։ Նախօրեին էլ հայ համայնքը մոմավառություն էր կազմակերպել՝ հարգելով ընկածների հիշատակը։

Աղբյուր` Փաստինֆո