Փաստ ինֆո

Միջազգային հանրության արձագանքը, միանշանակ, համապատասխան չէ ադրբեջանաթուրքական ագրեսիային,- «Փաստինֆո»-ի հետ զրույցում ասաց ԲՀԿ խմբակցության քարտուղար Արման Աբովյանը:

Ինչպես արդեն տեղեկացրել ենք՝ սեպտեմբերի 27-ի վաղ առավոտյան Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին ակտիվ ներգրավված է նաեւ Թուրքիան։

ՀՀ ԱԳՆ-ն հայտարարել է, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների։

Այսօր՝ հոկտեմբերի 3-ին, ՀՀ պաշտպանության նախարարությունը հայտարարել է, որ հակառակորդը հեռահար հրթիռներով թիրախավորել է քաղաքացիական և ռազմական նշանակության ենթակառուցվածքներ, ինչն էլ իր հերթին կարող է հանգեցնել հումանիտար աղետի:

ԱԺ պատգամավոր Արման Աբովյանը մեզ հետ զրույցում վստահեցրեց, որ միջազգային հանրության անտարբերությունը այս ամենին բերելու է հումանիտար աղետի ոչ միայն Հայաստանում, այլ՝ ողջ տարածաշրջանում. «Միջազգային հանրությունը դեռևս ոչ մի պատշաճ արձագանք չի տվել այս ամենին, միայն Ռուսաստանն է արձագանքել: Ես կարծում եմ, որ պետք է հավաքագրվեն Ադրբեջանի և Թուրքիայի կատարած հանցագործություններն ապացուցող փաստերը և դրանք ներկայացվեն միջազգային դատական ատյաններին, և նրանք էլ,ուսումնասիրելով համապատասխան փաստերը,ըստ այդմ խիստ պատժամիջոցներ կիրառեն այդ երկրների նկատմամբ»,- նշեց Արման Աբովյանը:

Պատգամավորի վստահեցմամբ՝ ադրբեջանաթուրքական տանդեմի սանձազերծած ագրեսիան սաստելու գործում կարևորագույն դերակատարում ունի հատկապես Ռուսաստանը: «Այժմ մեր կուսակցության անդամները այս ուղղությամբ աշխատանքներ են տանում իրենց ռուս գործընկերների հետ»,- հայտնեց Արման Աբովյանը:

Անդրադառնալով նաև ռազմական գործողությունները դադարեցնելու գործում Արցախի Հանրապետության անկախության ճանաչման գործոնին՝ պատգամավորը նշեց, որ Արցախի միջազգային լեգիտիմիզացիան պետք է սկսել օր առաջ. «Բոլոր տեսակի բանակցությունների հիմքը պետք է լինի Արցախի անկախության ճանաչումը, Արցախի դե յուրե լեգիտիմիզացիան՝ դե ֆակտո անկախությամբ: Այս գործընթացը պետք է սկսել օր առաջ: Դրա մասին մեր կուսակցության դիրքորոշումն է»,-եզրափակեց պատգամավորը:

Աղբյուր` Փաստինֆո