Փաստ ինֆո

ՀՀ վարչապետ Նիկոլ Փաշինյանն ուղերձով դիմեց ժողովրդին։

«ՀՀ հպարտ քաղաքացիներ, Ացախի հանրապետության հպարտ քաղաքացիներ, Սփյուռքի հպարտ հայրենակիցներ։ Արդեն մեկ շաբաթ է հայ ժողովուրդը Արցախում և Հայաստանում դիմակայում է ադրբեջանա-թուրքական ահաբեկչական հարձակմանը։ Հարձակման մասշտաբներն աննախադեպ են»,- ասաց Փաշինյանը։

Թշնամին գրոհում է այնպիսի ծավալներով, որ ըստ ռազմական փորձագետների՝ 21-րդ դարում հաճախ չի պատահել աշխարհի որևէ հատվածում, հակամարտության գոտիներից որևէ մեկում։

«Հարյուրավոր տանկեր և հետևակի մարտական մեքենաներ, հազարավոր արկեր և հրթիռներ, տասնյակ ինքնաթիռներ, հարյուրավոր անօդաչու թռչող սարքեր և տասնյակ հազարավոր հետևակներ արդեն մեկ շաբաթ գրոհում են Արցախի պաշտպանական բանակի դիրքերը շփման գծի ամբողջ երկայնքով։ Նախորդ օրվա մեր վերլուծությունները ցույց տվեցին, որ Արցախի պաշտպանության բանակի մեկ մարտական դիրքի վրա գրոհի են նետվում մոտ 150-ից 200 թշնակաման զինվոր, այսպիսի գրոհները կրկնվում են օրվա մեջ մի քանի անգամ, ուղեկցվում են հրթիռային և ավանդական հրետանու, զրահատեխնիկայի, օդանավերի, անօդաչու թռչող սարքերի աջակցությամբ»,- ասաց վարչապետը։

Մեր զինվորականների վկայությամբ՝ բացի ադրբեջանական բանակի ստորաբաժանումներից, գրոհներին ներգրավված են սիրիացի վարձկաններ ու ահաբեկիչներ, թուրքական բանակի հատուկ ջոկատայիններ։

«Մեր տեղեկություններով՝ թուրքական բանակի շուրջ 150 բարձրաստիճան զինվորականներ գտնվում են Ադրբեջանի ԶՈՒ տարբեր օղակների հրամանատարական կետերում և ղեկավարում են ռազմական գործողությունները։ Այս նկարագրությունը ինքնին պետք է վկայի, թե ինչպիսի ծանր մարտեր են տեղի ունենում առաջնագծում»,- ասաց ՀՀ վարչապետն իր կոչում։

Աղբյուր` Փաստինֆո