Փաստ ինֆո

Ադրբեջանական ագրեսիան հետ մղելու ընթացքում իր մարտական պարտքը կատարելիս զոհված զինծառայող Վյաչեսլավ Բադալյանը 22 տարեկան էր, մասնագիտությամբ՝ լրագրող։ Սլավան, ինչպես դիմում էին նրան ընկերները, Արարատի մարզից էր, արմատներով՝ Արցախից, ուներ ավագ քույր։ ԵՊՀ Ժուռնալիստիկայի ֆակուլտետը գերազանցությամբ ավարտելուց հետո անցել է պարտադիր ժամկետային զինվորական ծառայության։

Սլավայի կուրսընկերները հիշում են որպես լավ մարդ, բարի և կամեցող, պատրաստակամ էր օգնել ցանկացած հարցում։ Կորսընկերներից Էլինան «Փաստինֆո»-ի հետ զրույցում պատմեց, որ Սլավան երազանքներ ուներ և ապրում էր այդ երազանքով, պատրաստվում էր շարունակել ուսումը՝ մագիստրատուրայում, լրագրության մեջ թողնել իր հետքը, դառնալ հաղորդավար։ Նա նախկինում համագործակցել է «Հրապարակ» օրաթերթի, «Արարատ» ՀԸ-ի հետ, թղթակցել տարբեր ԶԼՄ-ների։ Էլինան պատմեց, որ Սլավայի հետ վերջին անգամ զրուցել է պատերազմից երկու օր առաջ։

«Ասել էր, որ քիչ է մնացել վերադառնալուն, որ հիմա ավելի շատ սկսել է ապագայի մասին մտածել և գիտակցել վաղվա օրը կառուցելու կարևորությունը »,- ասաց Էլինան՝ նշելով, որ նպատակների մասին են զրուցել։ Նրա խոսքով՝ միշտ վստահ է եղել, որ կկարողանա իր տեղը գտնել լրագրության ոլորտում, Էլինան էլ չէր կասկածում։

«Շատ խելացի տղա էր, ամեն ինչից գլուխ էր հանում, միշտ ասել եմ իրեն ու հիմա էլ եմ ասում, որ իր ապագան իրոք փայլուն կլինի, որևէ վայրկյան անգամ չեմ կասկածել։ Նա շատ էր ուզում հաջողության հասնել, հավատում էր, որ կհասնի։ Ասում էր՝ ուզում եմ պատմության մեջ մտնել, իմ հետքը թողնել, օգտակար լինել երկրին։ Փաստորեն՝ իր երազանքը կատարվեց, բայց ինքն այլևս չկա»,- նշեց Էլինա Ասատրյանը։

Մյուս կուրսեցին Նարե Խաչատրյանն էլ «Փաստինֆո»-ին պատմեց, որ ճանաչել է Սլավային համալսարանական տարիներին. «Կես բառից հասկանում էինք իրար»։ «Երբ տեսնում էր տխուր եմ, ասում էր՝ բա քեզ նման հումորով մարդուն սազում է այդպես լինել։ Իր մասին շատ բան ասել պետք չէ, չափազանց շատ կոնկրետություն էր սիրում։ Հիշում եմ՝ քննություններին առաջինն էր մտնում քննասենյակ , որովհետև անհամբեր էր։ Միշտ ասում էր՝ Նարե պարապել եմ, ինչու սպասեմ։ Արդարության կողմնակից էր, երբ պատրաստ չէր լինում, անպայման խոստովանում էր ու իր անկեղծության համար բոլոր դասախոսներն իրեն շատ էին սիրում։ Խելացիության մասին չխոսեմ, դասերին ակտիվ էր։ Լավ լրագրող էր, իր գործի մեջ նմանը չուներ և չէր լինելու։ Միշտ օպերատիվ էր, պիտի ամեն ինչ իմանար, որ հանկարծ խոսեն առաջինն ասի հա գիտեմ , դա էն չէր որ ասում էր․․․Նյարդայնանում էր, երբ կուրսում կարող է վատ սովորողը բարձր գնահատական ստանալ, չէ-չէ սխալ չհասկանաք, պարզապես բարկանում էր, երբ գիտեր, որ թերանում է։ Սլավին միշտ առաջին սեղանին եմ հիշում պատրաստ ու վստահ, դե կուրսի գերազանցիկն էր, պարտաճանաչության մասին չխոսեմ»,- պատմեց Նարեն՝ հավելելով, որ նա հպարտ տղա էր, հեռուստաընկերություններից մեկում փորձաշրջան էր գնում մի երկու ռեպորտաժ էր պատրաստել և սպասում էր իրենց զանգին, որ ասեն ընդունվել ես աշխատանքի։

«Չէին զանգում, ասում էի՝ Սլավ զանգիր , հետաքրքրվիր, հումորով գրում էր՝ չէ Նարե, արժանապատվությունս թույլ չի տալիս, իրենք չընդունեն ուրիշը կլինի։ Համառ էր ու դրա շնորհիվ արդեն մի քանի տեղ աշխատում էր։ Կիսատ թողած գործեր ուներ, որոնք մնացին անավարտ։ Հերոսս կյանքը զոհեց հանուն հայրենիքի։ Ժուռնալիստիկայի ֆակուլտետի 4 տարիների ընթացքում իրեն դրսևորել է որպես լավագույն ուսանող, լավագույնս նաև ծառայության ընթացքում․ Սլավը թերանալ չէր սիրում»,- եզրափակեց Նարեն։

Ինչպես արդեն տեղեկացրել ենք՝ սեպտեմբերի 27-ի վաղ առավոտյան Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքան։ Արցախի ռազմաքաղաքական ղեկավարությունը հայտարարել է, որ Ադրբեջանի կողմից կիրառվում է ոչ միայն թուրքական արտադրության զինտեխնիկա, այլ նաեւ թուրքական զորամիավորումներն են մասնակցում գրոհներին։Նման հայտարարությամբ հանդես է եկել նաեւ ՀՀ ԱԳՆ-ն՝ հայտարարելով, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։

Աղբյուր` Փաստինֆո