Փաստ ինֆո

Երեկ հակառակորդը կորցրել է 39 զրահատեխնիկա, 4 ՍՈւ 25 ինքնաթիռ, 3 ուղղաթիռ, 17 ԱԹՍ, շուրջ 830 անձնակազմ։Այս մասին Արցախ տեղեկատվական շտաբում ճեպազրույցների ընթացքում ասել է ԱՀ ՊՆ փոխնախարար Արթուր Սարգսյանը։

Նրա փոխանցմամբ՝ երեկ խոցված բոլոր ԱԹՍ-ները եղել են հարվածային։
Սարգսյանը հայտնեց, որ երեկ ինտենսիվ մարտեր են ընթացել ամբողջ ռազմաճակատով։

«Հակառակորդը շարունակել է գրոհել ՊԲ մարտակարգերը՝ կիրառելով ինքնաթիռներ, ուղղաթիռներ, ծանր հրանետներ, հրթիռահրետանային ողջ զինանոցը, օգտագործել է նաեւ զրահատանկային եւ հատուկ նշանակության ստորաբաժանումներ։

Մարտական գործողությունների դինամիկան, կիրառված սպառազինությունը, ռազմական տեխնիկան եւ անձնակազմի քանակն աննախադեպ են եղել՝ հատկապես հյուսիսային եւ հարավային ուղղություններով։ Օպերատիվ-մարտավարական եւ մարտավարական իրադրությունում էական փոփոխություններ չեն գրանցվել։

Գիշերվա ընթացքում լարվածությունը մի փոքր թուլացել է, սակայն հերտակոծումները շարունակվել են անընդմեջ։ ՊԲ ստորաբաժանումներն իրենց առջեւ դրված խնդիրները կատարել են փայլուն եւ անթերի՝ ձախողելով հակառակորդի առաջխաղացման բոլոր փորձերը»,- նշեց Սարգսյանը՝ նշելով, որ թշնամին, անհաջողություն կրելով, այս անգամ ևս, իր ձեռագրին համապատասխան թիրախավորել է քաղաքացիական բնակչությանը, մասնավորապես՝ Մարտունի, Մարտակերտ, Հադրութ քաղաքաները, որի ընթացքում նաև վիրավորվել են լրատվամիջոցների ներկայացուցիչները։

Նրա փոխանցմամբ՝ հակառակորդի խոցված սպայի մոտ հայտնաբերվել է իսրայելական ռադիոընդունիչ սարք, որի առգրավման արդյունքում պարզվել է, որ մարտերը ղեկավարվում է արաբերեն։

Աղբյուր` Փաստինֆո