Փաստ ինֆո

Ռուսաստանի արտգործնախարար Սերգեյ Լավրովը և Իրանի ԱԳ նախարար Մոհամմադ Ջավադ Զարիֆը ուրբաթ հեռախոսազրույցի ընթացքում մտահոգություն են հայտնել Լեռնային Ղարաբաղում շարունակվող մարտական գործողությունների հետ կապված:

«Հանգամանալից քննարկվել է Լեռնային Ղարաբաղի հակամարտության գոտում տիրող իրավիճակը», - ասվում է ՌԴ ԱԳՆ հաղորդագրության մեջ: «Երկու կողմերն էլ լուրջ մտահոգություն են հայտնել շարունակվող լայնածավալ մարտական գործողությունների, ինչպես նաեւ Սիրիայում եւ Լիբիայում անօրինական զինված կազմավորումների զինյալների ներգրավվածության կապակցությամբ»:

Գերատեսչությունում հավելել են, որ զրույցի ընթացքում նախարարները նաեւ կարեւորել են այն դերը, որը կարող են խաղալ տարածաշրջանի երկրները, հատկապես Ադրբեջանի եւ Հայաստանի հարեւանները, պայմաններ ստեղծելու համար, որոնք կնպաստեն կողմերի շուտափույթ վերադարձին բանակցությունների սեղանի շուրջ:

«Լավրովն ընդգծել է, որ Ռուսաստանը կշարունակի ինչպես ազգային, այնպես էլ ԵԱՀԿ Մինսկի խմբի համանախագահների «եռյակի» շրջանակներում միջնորդական ջանքեր գործադրել ղարաբաղյան հակամարտության կարգավորմանը քաղաքական-դիվանագիտական միջոցներով աջակցելու համար»,-նշել են նախարարությունում:

Աղբյուր` Փաստինֆո