Փաստ ինֆո

«Այսպես թե այնպես, Թուրքիան ամեն կերպ ցանկանում է ոչնչացնել մեր ազգը, դրանց նպատակը պարզ է։ Սրանք օգտագործելու են Ադրբեջանի հնարավորությունները՝ Հայաստանում ողջ հետախուզական աշխատանքները թարմացնելու համար, ընդ որում, ոչ միայն անօդաչու թռչող սարքերի, այլ նաև հետախուզական ցանցի միջոցով։ Այսինքն, Հայաստանի սահմանների վրա տոտալ հետախուզական աշխատանք է ընթանում, իսկ դա սովորաբար լինում է պատերազմից առաջ,- ասում է Ազգային անվտանգության նախարարի նախկին տեղակալ Գուրգեն Եղիազարյանը, «Փաստինֆո»-ի հետ զրույցում անդրադառնալով երեկ ուշ գիշեր Հայաստանի Հանրապետության տարածքում խոցված անօդաչու թռչող սարքերի թեմայի վերաբերյալ,- հետախուզական աշխատանքներ Թուրքիան հիմա 100 տոկոսով կատարում է նաև Նախիջևանի սահմանից՝ հետևելով մեքենաների շարժին, որպեսզի պարզի դեպի Արցախ տեղափոխվող օգնության ծավալները, բայց ես կարծում եմ, որ առաջիկա երկու օրերի ընթացքում թուրք-ադրբեջանական տանդեմի ողնաշարն Արցախում կկոտրվի։ Ադրբեջանն արդեն իսկ իր տիրոջ՝ Թուրքիայի հետ տանուլ է տվել այս պատերազմը, ուղղակի ուղեղ չունի, որ այդքանը հասկանա։ Ալիևն իր ընտանիքով է պատասխանատու այս ամենի համար։ Հիմա նա, հավանաբար, իր ընտանիքին արդեն դուրս է հանել Ադրբեջանից և ուղարկել Թուրքիա»։ 

Երևանի վրա ռազմական ագրեսիա բանեցնելու թշնամու հեռանկարը Գուրգեն Եղիազարյանը բացառում է, հիմնավորելով դա առաջին հերթին ՀԱՊԿ-ի հանգամանքով.

«Փառք Աստծո, որ մենք ունենք 102-րդ բազա։ Հիմա պատկերացնո՞ւմ եք, թե ինչ վիճակի մեջ կհայտնվեինք մենք, եթե այդ բազան Արաքսի ափին կանգնած չլիներ։ Ռուսաստանը մեր բարեկամն է, իսկ բարեկամին վերաբերում են բարեկամաբար։ Երևանում մենք խնդիր չենք ունենա։ Չմոռանանք նաև Իրանի ֆակտորը, հանձինս որի մենք հարավային սահմանին դաշնակից երկիր ունենք։ Ինչ վերաբերում է Երևանի մատույցներում երեկ խոցված ԱԹՍ-ների հանգամանքին, չի բացառվում, որ թշնամին սրանով այլ նպատակներ է հետապնդում, որպեսզի մենք սկսենք մտածել, թե Թուրքիան կարող է Նախիջևանի կողմից հարձակվել մեզ վրա։ Սա ավելի շուտ հոգեբանական ճնշում է, որովհետև, ես չեմ կարծում, թե Թուրքիան կհամարձակվի հարձակվել Հայաստանի Հանրապետության վրա։ Ուրիշ բան, որ նրանք այդպիսի բան կծրագրավորեն, բայց հարձակում չի լինի։

Նորից եմ կրկնում, մեր բարեկամ երկիրը, որի ռազմաբազան գտնվում է Արաքսի ափին, ուղղակի կերպով որոշակի բեկում կմտցնի այդ ամենի մեջ։ Այսպես` թե այնպես, այս ամենը ստուգաբանության է ենթարկվում, որի արդյունքների մասին մենք կիմանանք պատերազմական գործողությունների ավարտին, որովհետև շատ բաների մասին հիմա դեռ չեն բարձրաձայնում»։

Խոսելով իրավիճակի առաջիկա զարգացումների թեմայով Գուրգեն Եղիազարյանը նկատում է՝ եթե թուրք ադրբեջանական տանդեմի կողմից նախաձեռնած այս խելագարությանը ամենամոտ ապագայում վերջ չդրվի, Ալիևը շատ օպերատիվ կերպով կկորցնի Եվլախն ու Գանձակը, Լենքորանը կզրկվի ոռոգման ջրից, Ադրբեջանի 90 տոկոսը կհոսանքազրկվի։ Հենց թուրքի ողնաշարը կոտրվեց, դա ևս կլինի, կարծիք է հայտնում Ազգային անվտանգության նախարարի նախկին տեղակալը հավելում՝ հույս ունի, որ առաջիկա երկու օրերին դա տեղի կունենա։
Հեղինակ՝ Նվարդ Մանվելյան

Աղբյուր` Փաստինֆո