Փաստ ինֆո

«Տիգրանը շատ աշխատասեր, աշխույժ տղա էր, դպրոցում ուր նայում ենք, ամեն բան իրեն է հիշեցնում»,-այս մասին «Փաստինֆո»-ի հետ զրույցում զոհված զինծառայող Տիգրան Սիմոնյանի մասին պատմեց Ներքին Կարմիրաղբյուր միջնակարգ դպրոցի տնօրեն Նառա Պապյանը:

Ինչպես արդեն տեղեկացրել ենք՝ սեպտեմբերի 27-ի վաղ առավոտյան Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքան։ Արցախի ռազմաքաղաքական ղեկավարությունը հայտարարել է, որ Ադրբեջանի կողմից կիրառվում է ոչ միայն թուրքական արտադրության զինտեխնիկա, այլ նաեւ թուրքական զորամիավորումներն են մասնակցում գրոհներին։Նման հայտարարությամբ հանդես է եկել նաեւ ՀՀ ԱԳՆ-ն՝ հայտարարելով, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։

Հայաստանում ու Արցախում հայտարարվել է ռազմական դրություն։ Հայկական զինված ուժերն անցած օրերի ընթացքում զգալի կորուստներ են պատճառել ադրբեջանաթուրքական թուրքական տանդեմին՝ ոչնչացնելով մեծ քանակի զինտեխնիկա ու զինյալների։ Ցավոք, հայկական կողմը եւս ունի նահատակված հայորդիներ՝ թե ժամկետային զինծառայողների, թե պահեստազորայինների եւ թե կամավորների շրջանում։

Տիգրան Սիմոնյանը ժամկետային զինծառայող էր։

Տիկին Նառան մեզ հետ զրույցում հայտնեց, որ Տիգրանը ուներ քույր և եղբայր, ինքը տան փոքրն էր, Տիգրանի հայրն էլ կորցրել է ոտքը 90-ականների կռվի ժամանակ: «Հունվարին արդեն Տիգրանը պետք է հետ գար բանակից, ընկերուհի ուներ, շատ սիրում էին իրար, անհամբեր սպասում էին, որ գար բանակից ամուսնանային, բայց...»,-hուզված պատմեց տնօրենը:

Նրա խոսքով՝ Տիգրանը ամենաակտիվն էր ոչ միայն դասարանում, այլեւ՝ դպրոցում. «Դասարանում երկու տղա էին՝ Գագիկը և Տիգրանը, բայց դպրոցում ամեն ինչ, սկսած դպրոցի վերանորոգումից՝ իրենք էին կազմակերպում»,-մեզ հետ զրույցում պատմեց տնօրենը:

«Առավոտյան զանգեցին, ասեցին, որ Տիգրանը զոհվել է, չէինք հավատում, հույս ունեինք սխալվել են, բայց՝ չէ»- պատմեց տնօրենը՝ հիշելով, որ Տիգրանի հետ կապված ամենավառ հուշը առնչվում է վերջին զանգի փորձերին։

«Վերջին զանգին պարոն Փաշինյանը սահմանամերձ գյուղի դպրոցների երեխաներին հրավիրել էր ամառանոց՝ այնտեղ միասին նշելու, բայց Տիգրանը չէր ուզում, ուզում էր մնալ իր դպրոցում նշեինք, քանի որ արդեն պատրաստվել էին»,- մեզ հետ զրույցում ասաց տնօրենը:

Աղբյուր` Փաստինֆո