Փաստ ինֆո

Ադրբեջանը չի կատարում ՄԻԵԴ-ի կողմից սահմանված միջանկյալ միջոցի պահանջները,- «Փաստինֆո»-ի հետ զրույցում ընդգծեց ՄԻԵԴ-ում ՀՀ ներկայացուցիչ Եղիշե Կիրակոսյանը։ 

Ինչպես արդեն տեղեկացրել ենք՝ Հայաստանի Հանրապետությունը դիմել է Մարդու իրավունքների եվրոպական դատարան Ադրբեջանի նկատմամբ միջանկյալ միջոց կիրառելու պահանջով, այն է՝ պարտադրել Ադրբեջանին դադարեցնելու քաղաքացիական օբյեկտների ռմբակոծումը ՀՀ-ի և Արցախի Հանրապետության շփման գծի ողջ երկայնքով,.պարտադրել Ադրբեջանին ձեռնպահ մնալ ոչ ընտրանքային հարձակողական գործողություններից, պարտադրել Ադրբեջանին ձեռնպահ մնալ քաղաքացիներին, քաղաքացիական օբյեկտները և բնակավայրերը թիրախավորելուց:

ՄԻԵԴ-ը ՀՀ դիմումի հիման վրա սեպտեմբերի 30-ին որոշել է միջանկյալ միջոց կիրառել՝ կոչ անելով Ադրբեջանին և Հայաստանին զերծ մնալ այնպիսի միջոցներից, մասնավորապես ռազմական գործողություններից, որոնք կարող են հանգեցնել քաղաքացիական բնակչության կոնվենցիոն իրավունքների խախտման, այդ թվում՝ վտանգել նրանց կյանքն ու առողջությունը։ Միջանկյալ միջոց կիրառելու մասին որոշումից հետո էլ Ադրբեջանի ձեռագիրը չի փոխվել։ Հակառակորդը շարունակում է թիրախավորել խաղաղ բնակիչներին, իսկ այսօր՝ նաեւ լրագրողների խմբերին, որի հետեւանքով վնասվածքներ են ստացել ինչպես հայ, այնպես էլ օտարերկրացի լրագրողները։

ՄԻԵԴ-ում ՀՀ ներկայացուցիչ Եղիշե Կիրակոսյանը «Փաստինֆո»-ի հետ զրույցում նշեց, որ Ադրբեջանը կոպտորեն խախտում է ՄԻԵԴ-ի միջանկյալ միջոցի պահանջները։ Հայկական կողմն այս պահին բոլոր խախտումներն արձանագրում է, հավաքում խախտումների վերաբերյալ ապացույցները և ներկայացնում են ՄԻԵԴ։ Կիրակոսյանը նշեց, որ և՛ երեկվա դեպքերի վերաբերյալ, և՛ այսօրվա կատարվող դեպքերի վերաբերյալ խախտումներն ամբողջությամբ ներկայացվում են ՄԻԵԴ։

Ինչ վերաբերում է ՄԻԵԴ-ի կողմից սահմանված միջանկյալ միջոցի պահանջների խախտման դեպքում կիրառվող զսպող մեխանիզմներին, ապա Կիրակոսյանը նշեց, որ հնարավոր են տարբեր իրավական և քաղաքական պատասխանատվության միջոցներ, մասնավորապես՝ սկզբնական շրջանում կարող է օգտագործվել Դատարանի մեխանիզմները, իսկ անհրաժեշտության դեպքում խնդիրը կարող է բարձրացվել նաև Նախարարների կոմիտեում։

Նշենք, որ խոսքը գնում է Կոնվենցիայի 34-րդ հոդվածի խախտման մասին։ Եթե ՄԻԵԴ-ն արձանագրեց Կոնվենցիայի 34-րդ հոդվածի խախտում, ապա Ադրբեջանի համար նախարարների կոմիտեում այս գործերով վճիռների կատարումը «ցավոտ» է լինելու։
Նշենք, որ միջանկյալ միջոց կիրառելու մասին դիմում ներկայացնելը ենթադրում է միջպետական գանգատ ներկայացնելու հեռանկար կամ նպատակ։ Եւ բացառված չէ, որ Հայաստանը ներկայացնի միջպետական գանգատ, ինչի հիմքերի առկայության մասին «Փաստինֆո»-ին ավելի վաղ հայտնել էր միջազգային իրավունքի փորձագետ Արա Ղազարյանը։

Ինչպես արդեն տեղեկացրել ենք՝ սեպտեմբերի 27-ի վաղ առավոտյան Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքան։ Արցախի ռազմաքաղաքական ղեկավարությունը հայտարարել է, որ Ադրբեջանի կողմից կիրառվում է ոչ միայն թուրքական արտադրության զինտեխնիկա, այլ նաեւ թուրքական զորամիավորումներն են մասնակցում գրոհներին։Նման հայտարարությամբ հանդես է եկել նաեւ ՀՀ ԱԳՆ-ն՝ հայտարարելով, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։ Վարձկանների օգտագործումը փաստել են նաեւ միջազգային լրատվամիջոցները։

Հեղինակ՝ Իզաբել Սահակյան

Աղբյուր` Փաստինֆո