Փաստ ինֆո

«Ադրբեջանի գործելաոճը նույնն է, այն տարիներով չի փոխվում։ Այդպես էր նաև 2016-ի ապրիլյան քառօրյա պատերազմի օրերին, երբ Ադրբեջանը փակել էր լրատվամիջոցների մուտքը՝ լուսաբանելու ռազմական գործողությունները,- «Փաստինֆո»-ի հետ զրույցում ասել է իրավապաշտպան Ռուբեն Մելիքյանը։ 

Ինչպես արդեն նշել ենք՝ ՄԻԵԴ-ի միջանկյալ որոշումից հետո Ադրբեջանը շարունակում է թիրախավորել խաղաղ բնակավայրերը, իսկ այսօր նաեւ լրագրողներին, որոնք առաջնագծում տիրող իրավիճակը լուսաբանելու համար գնացել էին Մարտունի։

Ռ.Մելիքյանի դիտարկմամբ՝ միակ տարբերությունն այն է, որ 2016 թվականին Ադրբեջանը արգելափակել էր նաև թուրքական մամուլի մուտքը, իսկ այսօր, կարծես, Թուրքիայի և Ադրբեջանի միջև որևէ տարբերություն չկա։ Այսինքն, այսօր մենք խոսում ենք ռազմական գործողություններին Թուրքիայի մեծ ներգրավվածության մասին և սրա դրսևորումներից մեկն էլ հենց այն է, որ միջազգային մամուլից Ադրբեջանը թույլատրում է միայն թուրք լրագրողների աշխատանքը»։

Անդրադառնալով այսօր Արցախում հայ և միջազգային լրագրողների վիրավորում ստանալու թեմային՝ փաստաբանը նկատում է՝ այստեղ ակնհայտորեն գործ ունենք թիրախային հարվածի հետ.

«Համաձայն միջազգային հումանիտար իրավունքի, նմանօրինակ իրավիճակներում լրագրողներն առանձին պաշտպանությունից օգտվող քաղաքացիական անձինք են։ Այստեղ մենք գործ ունենք մի իրավիճակի հետ, երբ տեղի է ունեցել հեռահար ռմբակոծություն, որի արդյունքում տարբեր տեսակի մարմնական վիրավորումներ են ստացել նաև տեղական և միջազգային լրագրողները։ Հատուկ տերմինաբանությամբ սա կոչվում է ոչ ընտրողական հարվածներ։ Սակայն այստեղ կա մի առանձնահատկություն՝ մի բան է, երբ մեր աղբյուրներն են խոսում այն մասին, որ մենք ունենք ադրբեջանական կողմից իրականացված ռազմական հանցագործության դեպքեր, մեկ այլ բան է, երբ այդ մասին խոսում է միջազգային հանրությունը։ Արցախի ռազմական գործողությունների ընթացքում վիրավորում ստացած միջազգային լրագրողների մասին, կարծում եմ, ամենամոտ ապագայում կբարձրաձայնեն միջազգային տարբեր հարթակներում, որպես քաղաքացիական անձանց նկատմամբ կիրառված ոչ ընտրողական ռմբակոծություններ, ինչն ակնհայտորեն խոսում է Ժնևյան 4-կոնվենցիայի կոպտագույն խախտման մասին, ինչն էլ՝ իր հերթին ռազմական հանցագործություն է»,- ասում է իրավապաշտպան Ռուբեն Մելիքյանը՝ «Փաստինֆո»-ի հետ զրույցում։

Հիշեցնենք, որ ղարաբաղա-ադրբեջանական շփման գծի ողջ երկայնքով այսօր առավոտ վաղ վերսկսել են թեժ մարտերը։ Ադրբեջանական զինուժը թիրախավորել է քաղաքացիական ծառայողներ հանդիսացող և տեղում լրագրողական առաքելություն իրականացնող անձանց։ Այս մասին հայտնում են Արցախի տեղեկատվական շտաբից։ Հայտնի է, որ այսօր ռազմական գործողությունների ընթացքում ադրբեջանական զինված ուժերը թիրախավորել են նաև Արցախում լրագրողական առաքելություն իրականացնող Agence France-Presse (AFP) միջազգային լրատվական գործակալության լրագրողներին տեղափոխող մեքենան։ Նույն օրը Արցախի Հանրապետության Մարտունի քաղաքում վիրավորվում են ստացել նաև Le Mond-ի երկու ֆրանսիացի լրագրող, որից մեկի վիճակը ծանր է։ Նրան այս պահին վիրահատում են, որից հետո նա կտեղափոխվի Ֆրանսիայի Հանրապետություն։ Լրագրողի տեղափոխության հարցով հրահանգել է անձամբ Ֆրանսիայի նախագահ Էմանուել Մակրոնը։

Հիշեցնենք, որ այսօր Արցախի Մարտունու քաղաքում ռազմական գործողությունները լուսաբանելիս վիրավորում են ստացել նաև 24news.am-ի լրագրող Սևակ Վարդումյանը և Արմենիա ՀԸ «Ժամը» լրատվականի օպերատոր Արամ Գրիգորյանը, ինչպես նաեւ ռուսական «Дождь» լրատվականի խմբագրի տեղակալը։

Հեղինակ՝ Նվարդ Մանվելյան

Աղբյուր` Փաստինֆո