Փաստ ինֆո

«Շարունակելով ռմբակոծել Հայաստանի Հանրապետության պետական սահմանները և թիրախավորելով խաղաղ բնակչությանը, Ադրբեջանը միջազգային քրեական ծանր հանցագործություն է կատարում Հայաստանի Հանրապետության պետական սահմանների նկատմամբ,- «Փաստինֆո»-ի հետ զրույցում ասաց Մարդու իրավունքների նախկին պաշտպան Լարիսա Ալավերդյանը՝ հավելելով,- մասնավորապես Ժնևյան կոնվենցիաների համապատասխան արձանագրություններով, մեկ առ մեկ նշված են բոլոր այն հանցագործությունները, որոնք այս օրերին իրագործում է սադրիչ կողմը, թիրախավորելով այն մարդկանց, ովքեր զենք չեն կրում կամ դադարել են զենք կրելուց։ Դրանք քաղաքացիական ծառայողներն են՝ այդ թվում լրագրողները, մարդու իրավունքների պաշտպանները և այլն։ 

«Սա արդեն այն սահմանային վիճակն է, երբ Հայաստանն այլևս այսպիսի հանցագործությունների մասին պետք է ոչ թե պարզապես տեղյակ պահի միջազգային ատյաններին, այլ, անհպաղ կերպով, առանց րոպե անգամ կորցնելու փաստերով հարստացված իրավական փաթեթե ձևակերպի, Ադրբեջանի նկատմամաբ իրականացված միջազգային ծանր հանցագործության վերաբերյալ և դիմի միջազգային պատկան մարմիններին։

Հիմա մենք այդ ուղղությամբ աշխատող փայլուն մասնագետներ ունենք։ Այլևս չի կարելի անգամ րոպե հապաղել, որովհետև այն, ինչ մինչ այս պահին արվել է հայկական կողմից իր մեջ ավելի շատ տեղեկատվական բնույթի աշխատանք է պարունակել, հիմա պետք է անհապաղ իրավական դաշտ անցնել»,- ասում է Լարիսա Ալավերդյանն, անդրադառնալով ռազմական գործողությունների արդյունքում վիրավորումներ ստացած քաղաքացիական անձանց և մասնավորապես իրենց մասնագիտական պարտքը կատարող լրագրողների վերաբերյալ։

Ինչպես արդեն տեղեկացրել ենք՝ սեպտեմբերի 27-ի վաղ առավոտյան Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքան։ Հակառակորդը թիրախավորել է քաղաքացիական բնակչությունը Արցախում և Վարդենիսում։

Ագրեսիայի հետևանքով կան զոհեր և վիրավորներ քաղաքացիական բնակչության շրջանում, առկա է գույքային մեծ վնաս։ Հայաստանի Հանրապետությունը դիմել է Մարդու իրավունքների եվրոպական դատարան Ադրբեջանի նկատմամբ միջանկյալ միջոց կիրառելու պահանջով, այն է՝ պարտադրել Ադրբեջանին դադարեցնելու քաղաքացիական օբյեկտների ռմբակոծումը ՀՀ-ի և Արցախի Հանրապետության շփման գծի ողջ երկայնքով,.պարտադրել Ադրբեջանին ձեռնպահ մնալ ոչ ընտրանքային հարձակողական գործողություններից, պարտադրել Ադրբեջանին ձեռնպահ մնալ քաղաքացիներին, քաղաքացիական օբյեկտները և բնակավայրերը թիրախավորելուց:

ՄԻԵԴ-ը ՀՀ դիմումի հիման վրա նախօրեին որոշել է միջանկյալ միջոց կիրառել՝ կոչ անելով Ադրբեջանին և Հայաստանին զերծ մնալ այնպիսի միջոցներից, մասնավորապես ռազմական գործողություններից, որոնք կարող են հանգեցնել քաղաքացիական բնակչության կոնվենցիոն իրավունքների խախտման, այդ թվում՝ վտանգել նրանց կյանքն ու առողջությունը։ Սակայն սեպտեմբերի 30-ին արձանագրվեց հերթական պատերազմական հանցագործությունը. Ռմբակոծել են Մարտակերտ քաղաքը, որի հետեւանքով զոհվել է 3 խաղաղ բնակիչ, իսկ ՀՀ ՄԻՊ-ը հայտարարել է, որ ստիպված է եղել Վարդենիսում դադարեցնել փաստահավաք առաքելությունը, քանի որ հակառակորդը շարունակել է գնդակոծել։

Հեղինակ՝ Վվարդ Մանվելյան

Աղբյուր` Փաստինֆո