Փաստ ինֆո

«Ակնհայտ է, որ քաղաքացիական բնակչությունը նպատակային, դիտավորյալ կերպով թիրախավորվում է ադրբեջանական զորքերի կողմից, ինչը պատերազմական հանցագործություն է։ Ամսի 27-ին, երբ Հադրութում տարեց կինը իր բնակարանում սպանվեց, սպանվել է ինքնասպան անօդաչու թռչող սարքից։ Դրանից ենթադրվում է, որ հատուկ կերպով թիրախավորվել է քաղքաքացիական բնակչությունը», այս մասին ասուլիսի ժամանակ հայտնեց ԱՀ ՄԻՊ Արտակ Բեգլարյանը՝ ներկայացնելով Ադրբեջանական ագրեսիայի հետևանքով քաղաքացիական անձանց նկատմամբ վայրագությունների վերաբերյալ փաստահավաք առաքելության արդյունքները։

«Վիրավորման դեպքերը երեկ 31-ն էին, այսօրվա Մարտունու դեպքերը ներկայացված չեն։ Ինչպես մահվան դեպքերը, վիրավորման դեպքերը նույնպես լայն աշխարհագրություն ունեն։ Ստեփանակերտում 10-ից ավելի լուրջ վիրավորման դեպք է արձանագրվել, Մարտունում 5, Մարտակերտում՝ 1, հարակից գյուղերում ևս դեպքեր են արձանագրվել։ Հադրութում՝1 և հարակից բնակավայրերում ևս կան դեպքեր»։

ՄԻՊ-ը պնդում է, որ պարզ է դառնում, որ Ադբեջանը առաջնագծի ամբողջ երկայնքով թիրախավորում է և ռազմական օբյեկտները, և քաղաքացիական բնակչությանը։

«Մինչև 14 տարեկան երեխաները 3 հոգի են եղել, 15-50 տարեկան դեպքեր կան, 50-ից բարձր տարեկան անձինք 15 հոգի են, ինչը 50 տոկոսն է երեկվա դրությամբ։ Նույնը սպանվածների վիճակագրության մեջ է՝ մեծ տոկոս են կազմում տարեց մարդիկ»։

ՄԻՊ Բեգլարյանը տեղեկացրեց, որ վիրավորման դեպքերից մեկը Մատաղիսում մեկ հղի կնոջ դեպքն էր։ Հնարավոր է եղել նրա և երեխայի կյանքը փրկվել։ Առանձին դեպք է գրանցվել տարեց մարդու մոտ, որը սեփական մեքենայով գնացում էր աշխատանքի։ Շատ են դեպքերը, երբ մարդիկ սեփական տան բակում են վիրավորվել։

«Մարտունի քաղաքի դեպքը կարևոր է արձանագրել՝ ամենակրտսերն է երկու տարեկան երեխա, ում ինը տարեկան քույրը՝ Վիկտորիա Գևորգյանը մահացել է։ Վիրավորվել է նաև նրանց մայրը։ Նա շեշտում է, որ երբ մեկ երեխան սպանվել է, մյուսը վիրավորվել, իրենք փորձել են հեռանալ այդ հատվածից ավտոբուսով, ադրբեջանական ԱԹՍ-ն հետապնդել է ավտոբուսին և հրթիռներ արձակել այդ ուղղությամբ»։

Աղբյուր` Փաստինֆո