Փաստ ինֆո

«Ենթակառուցվածքները լայնամասշտաբ կերպով վնասվել են՝ ճանապարհներ, էլեկտրացանցեր, գազատարեր։ Հրետակոծությունների ժամանակ առանձնակի հարվածի տակ են եղել ճանապարհները։ Եվ ճանապարհներին ևս մարդիկ վիրավորվել են, որովհետև ոմանք վիրավորվել են, երբ տեղափոխվում էին ավելի անվտանգ վայր։ Սա ևս լավ նյութ է՝ վերլուծելու Ադրբեջանի հասցրած հարվածների մոտիվացիան»,- այս մասին ասուլիսի ժամանակ հայտնեց ԱՀ ՄԻՊ Արտակ Բեգլարյանը՝ ներկայացնելով Ադրբեջանական ագրեսիայի հետևանքով քաղաքացիական անձանց նկատմամբ վայրագությունների վերաբերյալ փաստահավաք առաքելության արդյունքները։

Նշեց, որ երբեմն արգելված զինատեսակներ և մեթադաբանություն է կիրառվել.

«Մեր փաստահավաք աշխատանքի արդյունքում մեր արձանագրել ենք կասետային ռումբերի կիրառման դեպքեր, որոնք միջազգային նորմերով արգելված են հատկապես քաղաքացիական բնակչության, քաղաքացիական օբյեկտների կիրառելու համատեքստում։ Որոշ դեպքերում վիրավորումները արձանագրվել են հենց կասետային զենքերից, որոշ դեպքերում առկա են չպայթած կասետային զենքեր։ Նաև Ստեփանակերտի հարակից բնակավայրերի ուղղությամբ օգտագործել են Սմերչ հրթիռներ՝ ներառյալ կասետային տիպի»։

ՄԻՊ-ը հիշեցրեց, որ չպայթածներն առավել վտանգավոր են։ Ինքը ևս երբ վեց տարեկան է եղել, կորցրել է տեսողությունը հենց չպայթած զենքերի պատճառով։ Բեգլարյանը տեղեկացրեց, որ հայազգի որոշ զինվորների դիակները ըստ տեղեկությունների՝ գտնվում են ադրբեջանական զինված ուժերի վերահսկողության ներքո։ Հիշեց Ապրլյանի ժամանակ խոշտանգումներն ու կարծում է, որ այս կողմից միջազգային համայնքը մեծ անելիք ունի, քանի որ Ադրբեջանի ԶՈՒ վերահսկողության ներքո գտնվող մեր զինծառայողների դիակները վտանգի մեջ են։

«Ադրբեջանն ինտենսիվ կերպով կիրառում է արգելված զինատեսակներ և պատերազմի վարման արգելված մեթոդներ։ Արդեն ՀՀ և ԱՀ պաշտոնական տարբեր աղբյուրներով և միջազգային լրատվամիջոցների օգնությամբ ունենք որոշակի փաստեր, որ Ադրբեջանում մեր դեմ կռվում են սիրիացի վարձկաններ։ Ըստ այսմ տարածաշրջանում առկա է հումանիտար ճգնաժամի վտանգ»։,- ասաց Բեգլարյանը։

Եզրահանգումներն են, որ Ադրբեջանական ԶՈՒ մինչև այս պահն իրականացնում է քաղաքացիական բնակչության և օբյեկտների միտումնավո՛ր թիրախավորում, խախտվում է ԱՀ բնակչության կյանքի իրավունքը։ Տասնյակ հազարավոր մարդիկ դարձել են ներքին տարհանվածներ՝ փախստականներ։

«Կարևոր է նշել, որ ոչ մի փաստարկ, ոչ մի հիմնավորում միջազգային կազմակերպությունների կողմից՝ Արցախ չգալու մասով ինձ համար ընդունելի չէ, քանի որ դրանք բոլորը բացառապես քաղաքական բնույթի են։

Եվ մարդու իրավունքները բոլորը նշում են, որ համընդհանուր են։ Բայց երբ հարցը հասնում է չճանաչված պետություններին, սկսում են քաղաքական փաստարկներ բերել։ Ես միայն մարդու իրավունքների պաշտպանության առումով մտահոգություն եմ հայտնում, որ չճանաչված պետությունների բնակիչները շատ ավելի խտրական վերաբերմունքի են արժանանում և՛ կոնֆլիկտի համատեքստում և՛ միջազգային հանրության կողմից»,- ասաց Բեգլարյանը։

Աղբյուր` Փաստինֆո