Փաստ ինֆո

Այս տեսակ էքստրեմալ վիճակները նաև բացահայտում են ժողովրդին իր իրական դեմքով։ «Փաստինֆո»-ի հետ զրույցում այս մասին ասաց Հովհ. Թումանյանի անվան տիկնիկային թատրոնի տնօրեն Ռուբեն Բաբայանը։

«Ինքս ոգևորվում եմ, երբ տեսնում եմ մարդկանց և հիմնականում երիտասարդների վերաբերմունքը։ Օգնություն են հավաքում ով ինչով կարող է, ընդ որում այս ամենին մասնակցում է ամբողջ հասարակությունն անկախ հայացքներից, կրթվածության մակարդակից։ Կապի մեջ եմ իմ բազմաթիվ օտարերկրյա ընկերների հետ, համոզված եղեք՝ իրենք էլ են հիացած մեր վերաբերմունքով»,-ասաց Ռուբեն Բաբայանը՝ նկատելով, որ այն ոգևորությունը, որը կա, գիտակցված է։ Գիտեն՝ հանուն ինչի են գնում, և սա ցույց է տալիս, որ իսկապես նոր սերունդ է եկել։ Սերունդ, որի համար սա հայրենիք է, ով ծնվել է անկախ Հայաստանում, որը հոյակապ ձևի գիտի՝ ինչ է նշանակում հայրենիք պաշտպանելը։

Ռուբեն Բաբայանը վստահ է՝ միասնականությունն ուժ է տալիս առաջնագծում կանգնած զինվորներին. «Մարդիկ հասկանում են, որ կա կյանք ու այս կյանքը պետք է պաշտպանել։ Սա շատ կարևոր է։ Ինչ-որ ձևով փոխվել է ժողովրդի մտածողությունը, կյանքը դարձել է ավելի կարևոր։ Մահը ևս հանուն կյանքի է, ոչ թե հանուն մահի։ Սա շատ կարևոր է, գիտակցված մոտեցում է, որ մենք ուզում ենք՝ այստեղ կյանք լինի։ Սա մեր հայրենիքն է, ուրիշ տեղ չունենք գնալու։ Սա քաղաքակրթական պատերազմ է։ Մենք մեր քաղաքակրթությունը, արժեքային համակարգը պետք է առաջ տանենք։ Ինչու՞ են Թուրքիան ու Ադրբեջանը միացել։ Նրանք նույն քաղաքակրթական մակարդակի մեջ են. Բռնատիրական, մարդու իրավունքները ոտնահարող, սեփական ժողովրդին բանի տեղ չդնող, սեփական ժողովրդին որպես թնդանոթի միս ընկալող, սա շատ կարևոր է։ Երևի սա մեր ամենակարևոր, ամենաուժեղ զենքն է։ Ես իմ այս տարիքում հիացած եմ։ Հիշում եմ 90-ականների պատերազմը, որտեղ էլի կար մեծ ոգևորություն, հայրենասիրություն, բայց այս տեսակ բան չկար, որ մարդիկ գնային ու զինկոմիսարյատների մոտ հերթ կանգնեն։ Սա մեր նոր ձեռքբերումն է»,-նշեց Ռուբեն Բաբայանը։

Վերջինս նկատեց՝ ոգին շատ կարևոր է, բայց նաև կարևոր է, որ կարողանաս ավելի խելոք լինել, ավելի իմաստուն, ավելի իմաստուն, ավելի կրթված, ավելի լավ տիրապետել այդ ամբողջ տեխնիկային. «21-րդ դարում միայն ոգով չես հաղթի։ Դու պետք է ամեն ինչում լինես մի գլուխ բարձր քո թշնամուց։ Ոգին շատ կարևոր է, բայց ոգին առանց գիտելիքների անպաշտպան է։ Կարծում եմ՝ այս ամեն ինչն իրար հետ միասին շատ հզոր ուժ է։ Գիտեմ, որ այն տղաները, որոնք հիմա գնում են ռազմաճակատ ոչ միայն իրենց ոգին են առաջ բերում, այլև իրենց գիտելիքները։ Մեր թատրոնում տղաները, որոնք ծառայել էին, երկու օր առաջ նստած հաշվարկներ էին անում այն ամենի ինչի, որ սովորել են բանակում,վերհիշում էին իրենց զինվորական գիտելիքները։ Սա շատ կարևոր է. մարդիկ ոչ թե գնում են հենց այնպես, մարդիկ գնում են պատրաստված, գիտակցված և զինված գիտելիքներով»,-ասաց Ռուբեն Բաբայանը՝ հավելելով, որ այս պահին Հովհ. Թումանյանի անվան տիկնիկային թատրոնի երկու դերասանները որպես կամավոր մեկնել են Արցախ։ Նրա ուսանողներից երեքը ևս որպես կամավոր գնացել են։

Աղբյուր` Փաստինֆո