Փաստ ինֆո

Հայաստանյան երկու խոշոր սուպերմարկետների ցանց հրաժարվում են թուրքական ապրանքների վաճառքից։

Երևան Սիթի սուպերմարկետների ցանցի ֆեյսբուքյան էջից տեղեկանում ենք՝ դադարեցնում են թուրքական ապրանքների վաճառքը: Այս պահին վաճառվում են միայն մասնաճյուղերում առկա մնացորդները:

«Մեր ողջ անձնակազմով պատրաստ ենք միշտ սատարելու մեր սահմանապահ քաջ զինվորին այս դժվարին և օրհասական պահերին։ Մեր օգնությունն ու զորակցությունն ենք փոխանցում մեր անվախ զինվորներին»,- տեղեկացնում են սուպերմարկետի ֆեյսբուքյան էջում։

«Փաստինֆո»-ի հետ զրույցում սուպերմարկետների ցանցի մարքեթինգի պատասխանատուն տեղեկացրեց, որ հաճախորդների դժգոհություն են ունեցել, դրա համար են այդ քայլին գնացել։

«Այս իրավիճակից ելնելով մեր հաճախորդները դժգոհություն են ունեցել, դրա համար ժամանակավորապես այդ քայլին ենք գնացել, մինչև կհասկանանք՝ իրոք սուպերմարկետները կարո՞ղ են այդպես աշխատել, թե ոչ։ Եղել են շատ բողոքներ, այսօր էլ եղավ դեպք, երբ հաճախորդը մտել է, քաշել-գցել ապրանքներ։ Քանի որ երկրի վիճակը լարված է, հաճախորդին ոչինչ չենք ասել՝ հասկանալով իրավիճակը, ներողություն ենք խնդրել, որից հետո հաճախորդը հեռացել է»,- նշեց ցանցի պատասխանատուն և հավելեց, որ եթե սուպերմարկետը դիմի այդ քայլին, հրաժարվի թուրքական ապրանքներից՝ ֆինանսապես կտուժի, բայց ասում են՝ մեկ ազգի պես միմյանց հետ են։

«Եթե պետությունը որոշի՝ նման բան չենք անում, չենք անի բոլորս։ Եթե համագործակցությունը բաց մնա, այդ ապրանք բերողները փող են աշխատում, ճիշտ է հայ ընտանիքներ սնվում են այդ աշխատանքով, որոշ գումարն էլ գնում է Թուրքիա։ Եթե պետությունը դեմն առնի՝ այլընտրանք կգտնենք։ Ապրանքատեսականին Թուրքիայից այդքան էլ շատ չէ»,- հայտնեցին Երևան Սիթիից։

ՍԱՍ սուպերմարկետների ցանցը ևս հրաժարվում է թուրքական ապրանքներից։ Սուպերմարկետի մարքեթինգի պատասխանատու Սամվել Մանուկյանը «Փաստինֆո»-ի հետ զրույցում նշեց, որ այդ հարցով սուպերմարկետում գործընթաց է իրականացվում։

«Առհասարակ թուրքական ապրանքներ չենք վաճառելու։ Կարծում եմ, բոլորին պարզ է, թե ինչու»,- ասաց Մանուկյանը։

Մեր հարցախույզի ընթացքում պարզեցինք, որ մի շարք հագուստի խանութներ եւս որոշել են հրաժարվել թուրքական արտադրանքից ու Թուրքիայից ապրանք չներկրել։ Մենեջերներն ասում էին՝ այլ երկրներից կբերենք, օրինակ՝ Իտալիայից. «Ճիշտ է, մի քիչ թանկ կլինի, բայց ոչինչ, Թուրքիայից ոչինչ չենք բերելու»։

Աղբյուր` Փաստինֆո