Փաստ ինֆո

Երբ զորավարժություններն ավարտվեցին, F16 կործանիչներն Ադրբեջանից չհանվեցին՝ մնալով ադրբեջանական օդանավակայաններում։ Այս հարցը ՀՀ-ն բարձրացրել է համապատասխան մարմիններին։ Այս մասին այսօր ճեպազրույցի ժամանակ ասաց ՀՀ ՊՆ ներկայացուցիչ Արծրուն Հովհաննիսյանը։

«Ինչ վերաբերում է նրան, որ Ադրբեջանն ամեն կերպ փորձում է այս ամենը չընդունել և երեկվա այն հայտարարությունը, որ իբր իրենց ռազմաօդային ուժերի կազմում չկա F16, ասեմ ՝ որ մենք շատ լավ գիտենք՝ իրենց ռազմաօդային ուժերում ինչ կործանիչներ կան և լավ գիտենք, որ իրենց կազմում եղած կործանիչներն իրենց առաջադրված խնդիրները չեն կարող կատարել, ինչպես հարկն է, դրա համար էլ F16-երն այնտեղ են։ Լավ գիտենք, որ F16-երի հետ իրենք վաղուց աշխատում էին զորավարժություններով։ ՀՀ-ն տիրապետում է համապատասխան տեղեկությունների, այդ թվում ռադիոտեխնիկական հետախուզական միջոցների և բոլոր նրանց, ովքեր հերքում են և փորձում են լուրջ չվերաբերվել մեր պաշտոնական տեղեկություններին, համապատասխան անակնկալներ սպասում են ռադիոտեխնիկական հետախուզական ապացույցներով»,-ասաց Արծրուն Հովհաննիսյանը։

Վերջինս նշեց, որ այս առումով   ԱՀ նախագահն օրեր առաջ ասաց, որ կատարվում են հետախուզական թռիչքներ, մարտավարական լուծումներ.

«Ինչու՞ էին բերել, որովհետև նախ ադրբեջանական օդուժը չէր կարող այդ խնդիրը լուծել, այդ մակարդակը, տեխնիկական հագեցվածությունը չունի։ Երկրորդ՝  Թուրքիայի օդուժից բերվել էին նաև այլ սարքեր, որոնք համադրելի չեն ՍՈՒ 25-ի։ Այսինքն՝  օպերատիվ իրավիճակի կառավարման տեսանկյունից չէին կարող օգտագործել և հետևաբար պետք էր F16-ը, որպեսզի կարողանա այս համադրումն իրականացնել։ Մենք շատ լավ հասկանում ենք, որ F16-ն օդում է, զուգահեռ սահմանի մյուս կողմից ռադիոտեխնիկական կապի և կառավարման թուրքական ինքնաթիռ է թռչում։ Մենք շատ լավ գիտենք, որ միայն F16-ը կարող էր այդ ժամանակ գտնվելով թեկուզ 60 կմ հեռավորության վրա, համապատասխան բարձրությունից տեսնել ՍՈՒ 25-ին, որովհետև օդաչուներն այդքան փորձ ունեն, գիտեն՝ մարտավարապես ինչպես գային: Ոչ մի ՀՕՊ միջոց չէր կարող այդ պահին, այդ տեղում հայտնաբերել, իսկ F16-ը կարող էր»: 

Վերջինս չասաց, թե Ադրբեջանում այս պահին քանի F16 կա, սակայն ասաց, որ դրանք զույգերով կատարում են համապատասխան խնդիրներ։

Հարցին՝ այդ ինքնաթիռները որ երկրի տարածքով են եկել՝ Վրաստանի, թե Իրանի, Արծրուն Հովհաննիսյանն ասաց. «Այս պահին չեմ կարող այդ մասին հայտարարել, բայց այդ տեղեկություններին էլ ենք տիրապետում»։

Աղբյուր` Փաստինֆո