Փաստ ինֆո

«Ես հիանում եմ մեր զինվորների գործած ռազմական սխրանքներով։ Ինքս կռվին նայում եմ որպես այն անցած մարդ և հասկանում եմ, որ մեր զինվորը դուրս է եկել անհավասար մարտի-«Փաստինֆո»-ի հետ զրույցում ասել է լեգենդար գեներալ – մայոր, Արցախի հերոս Արկադի Տեր- Թադևոսյանը (Կոմանդոս), խոսելով վերջին օրերին մարտի դաշտում քաջարի մարտնչող հայ զինվորի մասին։

«Գիտեմ, թե ինչ է զգում մեր մարտիկը ռազմի դաշտում, երբ կողքին տեսնում է ընկած մարտական ընկերոջը, իսկ դիմացը 3-4 անգամ ավել սպառազինությամբ թշնամին է, որ հարձակվում է իր վրա։ Այսքանով հանդերձ, մեր զինվորը երբեք թիկունքը ցույց չի տալիս թշնամուն, մերոնք ռազմի դաշտում չեն փախչում։ Ընդհակառակը, մարտի դաշտում մեր զինվորը կրկնապատկում է իր մեջ եղած ներքին ուժը և հենց դրանով է նա հաղթում թշնամուն, հասկանո՞ւմ եք...» - նշել է Կոմանդոսն ու ավելացրել.«ի՞նչ կարող եմ այսքանից հետո ես ասել մեր զինվորներին, միայն այն, որ ես հպարտանում եմ նրանց գործած մարտական սխրանքներով, նրանց քաջությամբ։ Ես հիանում եմ նրանցով։ Տեսնում եմ, որ նրանք քաջ գիտակցում են, թե ինչի՞ համար են մարտի դաշտ ելել, որ այնտեղ նրանք պաշտպանում են իրենց ու մեր հայրենիքը, նրանք գիտեն, թե ի՞նչ է անցյալը, ի՞նչ են ուզում թուրքերը»։

Հերոսի գնահատմամբ՝ մեր զինվորը շատ լավ է պատրաստված, մանավանդ, որ հիմա՝ վերջին ռազմական գործություններում նա իրականում ադրբեջանական բանակի դեմ չի կռվում։ «Մեր զինվորը հիմա կռվում է հատուկ նշանակության թուրք ջոկատայինների դեմ, որոնց տարիներով պատրաստում են Թուրքիայի հատուկ մասնագետները։ Եվ այս դժվարին իրավիճակում և հենց այսպիսի պայմաններում, երբ տեսնում ես, թե ոնց են նրանք մարտնչում, հասկանում ես, որ զինվորն անպարտելի է, իսկ մեր բանակը՝ անհաղթ»,- ասել է Շուշիի ազատագրման փայլուն օպերացիայի հեղինակ Արկադի Տեր-Թադևոսյանը։

Աղբյուր` Փաստինֆո