Փաստ ինֆո

Ուսումնասիրությունները ապացուցում են, որ որևէ տարբերակում չի դրվում քաղաքացիական բնակչության կամ ռազմական օբյեկտների միջև՝ վտանգի տակ դնելով ողջ բնակչության կյանքը, առողջությունը։ Այս մասին այսօր ճեպազրույցի ժամանակ ասաց ՀՀ ՄԻՊ Արման Թաթոյանը։

Վերջինս արձանագրեց, որ այդ հարվածներն ակնհայտ նպատակային են և թիրախավորված են հենց քաղաքացիական օբյեկտներին վնաս հասցնելու համար. «Այս պահի դրությամբ քաղաքացիական խաղաղ բնակչության շրջանում կա 4 զոհ, ընդ որում ակնհայտ է, որ վտանգված է երեխաների, կանանց, տարեց մարդկանց կյանքը և առողջությունը, որովհետև մահացած մարդկանց թվում են և՛ կին, և՛ երեխա, և՛ տարեց մարդ։ Տասնյակ վիրավորների թվում էլ կան կանայք, երեխաներ, տարեց մարդիկ և խնդիրը նաև նրանում է, որ այս գործողություններն ուղեկցվում են նաև խաղաղ բնակչության համար կենսական նշանակություն ունեցող օբյեկտներին հարվածներ հասցնելու կամ դրանք պարալիզացնելու ուղղությամբ։ Խոսքը վերաբերում է կապի միջոցներին, խաղաղ բնակչության տեղաշարժման համար անհրաժեշտ կենսական նշանակության ճանապարհներին և այլն»,-նշեց Արման Թաթոյանը՝ընդգծելով, որ այդ հարվածներն ակնհայտորեն կրում են համակարգված բնույթ։

Արման Թաթոյանը նշեց, որ առաջին պահիս սկսած այս բոլոր հարձակումներն ուղեկցվում են ատելության ինտենսիվ, լայնածավալ խոսքով։ Մարդու իրավունքների պաշտպանի խոսքով ատելության բարձր մակարդակը դարձել է համակարգված, շատ ավելի ուժեղացված, տարածում են հատուկ պատրաստված տեսանյութեր, որոնք նպատակ ունեն խաղաղ բնակչության շրջանում առաջացնել վախ, տագնապ. «Ընդ որում քարոզչություն է գնում բռնության կոչերով, սպանության կոչերով։ Մասնագետների հետ քննարկում ենք ունեցել այդ սոցիալական ցանցերի վտանգավորության հետ կապված և եզրահանգումն այն է, որ դրանցից առավել վտանգավորը TikTok կոչվող սոցիալական ցանցն է, որովհետև այդ տիրույթում հնարավոր չէ վերահսկել այն նյութերը, որ ստացվում է»,-ասաց Արման Թաթոյանը՝ հավելելով, որ ադրբեջանական և թուրքական աղբյուրներից եկող այս մեծ ծավալի, համակարգված ատելության խոսքը վկայում է այն մասին, որ և՛ թիրախավորված են երեխաները, և՛ նաև ակնհայտ է նաև այդ ատելության խոսքը։ Արման Թաթոյանը երեխաներին և ծնողներին հորդորեց զերծ մնալ TikTok սոցիալական ցանցում գտնվելուց։

Աղբյուր` Փաստինֆո