Փաստ ինֆո

Վերջին մի քանի տարվա ընթացում Թուրքիան փոխել է քաղաքականությունը տարածաշրջանում։ «Փաստինֆո»-ի հետ զրույցում այս մասին ասաց թուրքագետ Անդրանիկ Իսպիրյանը։

Բանախոսը նկատեց՝ Թուրքիան մշտապես Ադրբեջանին աջակցել է զենքով, վարձկաններով, կամավորներով, և սա նոր չէ։ Անդրանիկ Իսպիրյանի խոսքով նոր է այն, որ երկար ժամանակ չէր եղել այն, ինչ հիմա է տեղի ունենում. «Թուրք-ադրբեջանական այս լայնածավալ զորավարժություններից հետո որոշ տեխնիկաներ ուղղակի դուրս չբերվեցին Ադրբեջանից։ Բացի այդ՝ առանց գրանցման բավականին շատ զինտեխնիկա է Ադրբեջան ներմուծվել Թուրքիայից, տարբեր ճանապարհով Ադրբեջան հասել։ Նաև այդ զինտեխնիկան է օգտագործվում։ Կա թուրքական զինտեխնիկա, թուրքական անձնակազմ, նկատի ունեմ հենց Թուրքիայի քաղաքացիներ։ Նրանք հիմնականում հրահանգիչներ են, ովքեր ադրբեջանցիներին օգնում են ճիշտ շահագործել զինտեխնիկան։ Բոլորը գիտեն՝ ադրբեջանցիները չեն կարողանում լավ օգտագործել իրենց ձեռքի տակ եղած բավականին շատ և արդյունավետ զենքեր։ Թուրքիայից ժամանած հրահանգիչները, սպաները փորձում են Ադրբեջանին օգնել նաև ճիշտ շահագործել այդ զինտեխնիկան»,-ասաց թուրքագետը՝ ընդգծելով, որ այժմ մեր մաշկի վրա ենք զգում Թուրքիայի քաղաքականության փոփոխությունը։ Դա ապացուցվեց հենց հուլիսին Տավուշի ուղղությամբ ադրբեջանական սադրանքների ժամանակ Թուրքիայի հայտարարություններով. «Թուրքիան արեց այնպիսի հայտարարություններ, որոնք աննախադեպ էին, և դրանք շարունակվում են մինչև հիմա։ Հուլիսյան դեպքերի ժամանակ Թուրքիայի իշխանությունների արձագանքը ոչ թե դատապարտումներ էին, այլ ուղիղ ձևով սպառնալիքներ՝ ուղղված Հայաստանի անվտանգությանը։ Իրենք անցել էին էթիկայի բոլոր նորմերը, դիվանագիտական լեզվի բոլոր կանոններն անցել էին ու վիրավորանքների էին անցել»,-ասաց Անդրանիկ Իսպիրյանը։

Վերջինս ընդգծեց, որ այս կոնֆլիկտին Թուրքիայի միջամտությունը միջազգային հանրության կողմից չի ստանում համարժեք արձագանք. «Տավուշյան դեպքերը, Թուրքիայի հայտարարությունները, զորավարժությունները ցույց տվեցին, որ սա ուղղված է Հայաստանի դեմ, և դրա համարժեք արձագանքների բացակայությունը Ադրբեջանին ու Թուրքիային ստիպեցին գնալ այս քայլին»,-նշեց Անդրանիկ Իսպիրյանը։

Թուրքագետը գտնում է՝ այս քայլով Թուրքիան մի քանի հարց է լուծում։ Նախևառաջ փորձում է թուլացնել Հայաստանին, բացի այդ Ադրբեջանին հանել Ռուսաստանի ազդեցությունից. «Թուրքիան շատ լավ է հասկանում, որ արցախյան հարցում Ադրբեջանը կախվածություն ունի Ռուսաստանից և փորձում է ցույց տալ, որ ինքը կարող է փոխարինել Ռուսաստանին։ Դա երկու շահ է հետապնդում՝ քաղաքական և տնտեսական, քանի որ Թուրքիան փորձում է Ադրբեջանին ուղղորդել իրենց ռազմարդյունաբերություն։ Երկար ժամանակ ուղղակի դիտորդի դերում էր, թե ինչպես էր Ադրբեջանը միլիոնավոր դոլարներ ուղղում իսրայելական, ուկրաինական ռազմարդյունաբերություն և փորձում է ինքն էլ անմասն չմնալ փոքրիկ եղբոր նավթադոլարներից»,-նշեց Անդրանիկ Իսպիրյանը։

Աղբյուր` Փաստինֆո