Փաստ ինֆո

«Թուրքական կողմի վերջին օրերի վարքագիծը՝ վերջին շաբաթների, ամիսներ ու տարիների վարքագծի պրակտիկ կիրառությունն է։ Սա երկար մշակված քաղաքականության կոնկրետ դրսևորում է։ Սա այն վտանգն է, որ վաղուց արդեն տեսանելի էր՝ ուղղված հայության դեմ»,- «Փաստինֆո»-ի հետ զրույցում ասել է թուրքագետ Ռուբեն Մելքոնյանը՝ նշելով՝ վաղուց ակնհայտ է, որ Թուրքիան որպես ագրեսոր բացահայտ կերպով ներխուժել է արցախյան հակամարտության մեջ և իրականացնում է ագրեսորին բնորոշ քայլեր։

Ինչպես արդեն տեղեկացրել ենք՝ սեպտեմբերի 27-ի վաղ առավոտյան Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքան։ Արցախի ռազմաքաղաքական ղեկավարությունը հայտարարել է, որ Ադրբեջանի կողմից կիրառվում է ոչ միայն թուրքական արտադրության զինտեխնիկա, այլ նաեւ թուրքական զորամիավորումներն են մասնակցում գրոհներին։Նման հայտարարությամբ հանդես է եկել նաեւ ՀՀ ԱԳՆ-ն՝ հայտարարելով, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։

Պաշտոնական Անկարան եւս չի թաքցնում իր զինված միջամտությունը. Սեպտեմբերի 28-ին Թուրքիայի նախագահ Ռեջեբ Թայիբ Էրդողանը հայտարարել է, թե «ժամանակն է վերջ դնել «Հայաստանի կողմից Ադրբեջանի տարածքների զավթմանը»»:

Թուրքագետը «Փաստինֆո»-ի հետ զրույցում փաստեց՝ Թուրքիայում օրեցօր՝ և՛ երեկ, և՛ այսօր ավելի բացահայտ են հնչում Հայաստանի հանդեպ ուղղակի ռազմական ագրեսիա կիրառելու կոչերը և դրա համար տարբեր հիմքեր են փնտրվում՝ կլինի իբր Հայաստանում տեղակայված քրդական ճամբարների հարցը, և այն։

Ռուբեն Մելքոնյանն ընդգծում է՝ թուրքական կողմի կոշտ և ագրեսիվ միջամտության քաղաքականության կոնկրետ հիմնավորումներից է հենց այս պահին Վարդենիսի, այսինքն՝ Հայաստանի Հանրապետության պետական սահմանների ռմբակոծումը.«Ողջ թուրքական վերնախավն, ըստ էության, հենց այդ գիծն է առաջ տանում, որ անմիջապես պետք է հարվածել նաև Հայաստանին։ Պետք է պատրաստ լինենեք նրան, որ ոչ միայն Ադրբեջանը, այլ նաև Թուրքիան կարող է հանդես գալ հարվածողի դիրքերից։ Սա լայնամասշտաբ պատերազմ է՝ Հայաստանի դեմ, այլ կերպ ասած, Հայաստանն այսօր պատերազմ է մղում երեք ճակատի դեմ՝ Ադրբեջան, Թուրքիա և ահաբեկիչներ»։

Թուրքիայի այս պահվածքն, ըստ թուրքագետի, խոսում է այն մասին, որ այդ երկիրը ոչ թե միջազգային չափորոշիչներին համապատասխանող պետություն է, այլ ըստ էության, մի պետական միավոր, որը ահաբեկչական խմբերին հատուկ ոճով է գործում։

Ռուբեն Մելքոնյանը նկատում է՝ Թուրքիային զսպող միակ ռեալ օղակն այս պահին ոչ թե տարբեր պետությունների կողմից հնչող հայտարարություններն են, այլ մեր ռազմավարական դաշնակցի անհապաղ և ակտիվ ներգրավումը՝ Հայաստանի Հանրապետության և Արցախի դեմ հրահրված ռազմական ագրեսիային.«Իհարկե առաջնային զսպող օղակը մեր բանակն է՝ իր մարտունակ և պրոֆեսիոնալ գործունեությամբ։ Այնուամենայնիվ, առաջնորդվելով իրատեսությամբ պետք է հասկանանք, որ եռագլուխ թշնամու դեմ պատերազմելու հարցում, բացի մեր բանակից մեզ պետք են դաշնակիցներ, աջակիցներ, իսկ մեր միակ, բնական ու հուսալի աջակիցն ու դաշնակիցն այս պահին Ռուսաստանի Դաշնությունն է և ՀԱՊԿ-ը։ Կարծում եմ, որ արդեն այսօրվա վերջին ռազմական զարգացումները՝ Հայաստանի Հանրապետության պետական սահման տեղափոխված ադրբեջանական ռազմական ագրեսիան շատ լավ ապացուցեցին, որ Թուրքիայի նկրտումներն ու ագրեսիան զսպող միակ պետությունը դեռևս Ռուսաստանի Դաշնությունն է, որովհետև, ինչպես տեսնում ենք, Թուրքիայի ագրեսիան գնալով ավելի ու ավելի է աճում։ Այլ կերպ ասած, եթե Հայաստանի Հանրապետության վրա ուղիղ սպառնալիք լինի, ինչը մենք արդեն այսօր առավոտվանից տեսնում ենք, ապա Ռուսաստանի Դաշնությունն ու ՀԱՊԿ-ն անհապաղ պետք է արձագանքեն»։

Կուշանա՞ արդյոք ՀԱՊԿ-ի արձագանքը հարցին, Ռուբեն Մելքոնյանը նկատում է՝ այդպիսի կառույցների արձագանքը հատուկ ընթացակարգ է ենթադրում, այնպես որ մեզ մնում սպասել և հետևել դեպքերի զարգացմանը։

Հեղինակ՝ Նվարդ Մանվելյան

Աղբյուր` Փաստինֆո