Փաստ ինֆո

Ադրբեջանն ուզում է Ղարաբաղը, բայց Թուրքիան միայն Ղարաբաղը չի ուզում, այլ նաեւ Հայաստանը։ Հայաստանը խանգարում է Թուրքիայի պանթուրքիզմի ծրագրին,- «Փաստինֆո»-ի հետ զրույցում հայտարարել է Արցախի հերոս, գեներալ- մայոր Արկադի Տեր-Թադևոսյանը։ 

Ըստ նրա՝ սեպտեմբերի 27-ին ձեռնարկված ռազմական գործողություններով «փոքր» նպատակն են դրել՝ վերցնել Արցախը, բայց դրանով կռիվը չի վերջանա։

« Պարզ է, որ Ադրբեջանն ուզում է վերցնել Արցախը, բայց նա դա երբեք չի կարող ստանալ։ Ո՛չ Արցախի դիրքը, ո՛չ այնտեղ ապրող բնակչությունը, ո՛չ էլ մեր բանակը իրեն դա թույլ չեն տա։ Ադրբեջանը պետք է հասկանա, որ ռազմի դաշտում չի կարող հաղթել հային։ Փոխարենը Թուրքիան է խաղի մեջ մտել, իսկ ի՞նչ է ուզում Թուրքիան՝ սա է ավելի վտանգավոր հարց այս պահին։ Իրականությունն այն է, որ Հայաստանը խանգարում է Թուրքիային՝ իրականացնելու պանթուրքիզմի իր գաղափարը։ Թուրքիան նոր 15 թվական է ուզում բերի մեր գլխին։ Մենք պետք է հասկանանք նաև, որ երեկվանից հայ զինվորի դեմ կռվում են ոչ թե ադրբեջանական բանակը, այլ Թուրքիայի կողմից տարիներով պատրաստված հատուկ ջոկատայինները։ Սա անհավասար պայքար է՝ բոլոր առումներով՝ սկսած մարդկային ռեսուրսներից, մինչև ռազմական տեխնիկան»,- նշել է Կոմանդոսը։

Նա ընդգծել է իրատես լինելու կաեւորությունը։ «Լավ կլիներ մենք իրատես լինեինք ու ընդունեինք, որ կարող է լինել վատթարագույնը, այն, որ այս ռազմական գործողությունները կարճ չեն տևի, սա 2016 թվականի ապրիլը չէ, այստեղ թշնամին իր առաջ այլ ռազմական խնդիրներ է դրել։ Պետք է պատրաստվել երկարատև պատերազմի։ Այս մասին է խոսում նաև և՛ Հայաստանում, և՛ Ադրբեջանում երեկվանից հայտարարված ռազմական դրությունը»,- ընդգծել է Ա.Տեր-Թադեւոսյանը։

Խոսելով ռազմական գործողությունների դադարի մասին՝ Արկադի Տեր-Թադևոսյանը նկատում է՝ իսկ ո՞ւր է մեր դիվանագիտությունը, որ չի ասում՝ վայր դրեք զենքերը, փորձենք ռազմական գործողությունները լուծենք դիվանագիտական ճանապարհով։

Մանրամասները՝ տեսանյութում

Հեղինակ՝ Նվարդ Մանվելյան

Աղբյուր` Փաստինֆո