Փաստ ինֆո

Ռուսաստանի հայերի միության (ՌՀՄ) նախագահ Արա Աբրահամյանը «Подъём» հեռագրային ալիքի հետ զրույցում այսօր՝ սեպտեմբերի 28-ին հայտարարել է, որ Ռուսաստանի շուրջ 20 հազար  հայեր ցանկություն են հայտնել կամավորներ մեկնել Լեռնային Ղարաբաղ, որտեղ նախօրեին լայնածավալ մարտական գործողություններ են սկսվել:

«Սա Ադրբեջանի և Թուրքիայի լայնամասշտաբ ծրագրված ակցիա է։ Նրանք ուզում են, որ Ղարաբաղում ոչ մի հայ չլինի։ Դրա համար նրանք օգտագործում են կորոնավիրուսի հետ կապված համաճարակաբանական իրավիճակը։ Ինքնաթիռ չկա, օգնություն, նույնիսկ հումանիտար, ուղարկել անհնար է։ Հիմա մեզ մոտ մեկ գիշերվա ընթացքում 20 հազար կամավորների ցուցակ է հավաքվել», - ասաց Աբրահամյանը ։

Այդ կապակցությամբ ՌՀՄ-ն կդիմի ռազմական տրանսպորտով ապահովելու խնդրանքով, որպեսզի մարդկանց ուղարկեն Հայաստան, հավելել Է կազմակերպության ղեկավարը:

Աբրահամյանը նաեւ հայտնել է, որ հայերի Միությունը կդիմի Վլադիմիր Պուտինին՝ խնդրելով օգնել դադարեցնել զինված հակամարտությունը:

«Մենք երեկ ժողով ենք ունեցել, մենք ընդունել ենք մի քանի կետեր, այդ թվում դիմել նախագահին, բոլոր կառույցներին եւ խնդրել անհապաղ դադարեցնել այդ պատերազմը, որպեսզի Ռուսաստանը օգնի դադարեցնել հակամարտությունը եւ հումանիտար եւ այլ օգնություն ցույց տա», — նշել է ՌՀՄ ղեկավարը:

Հիշեցնենք, որ սեպտեմբերի 27-ի վաղ առավոտյան ղարաբաղա-ադրբեջանական շփման գծի ամբողջ երկայնքով թշնամին վերսկսել է  ռազմական ագրեսիան։ Ընդ որում՝ Ադրբեջանն օգտագործում է ոչ միայն թուրքական զինտեխնիկան, այլ նաեւ արցախցիների դեմ կռվում են թուրքական զորամիավորումները, վարձկանները:

ԱՀ նախագահ Արայիկ Հարությունյանը հայտարարել է, որ Արցախի դեմ կռվում է ոչ թե Ադրբեջանը, այլ Թուրքիան։ «Փաստացիորեն ստեղծվել է մի իրավիճակ, երբ Արցախի ժողովուրդը մարտնչում է թուրք-ադրբեջանական դաշինքի դեմ։ Թուրքիան, որը մեկ դար առաջ բնաջնջել է իր պատմական հայրենիքում ապրող հայ ժողովրդին և մինչ օրս արդարացնում է այդ ոճիրը, ներկայումս հնարավոր բոլոր միջոցներով սատարում է Ադրբեջանին՝ այդ նույն ցեղասպան գործողությունները Հարավային Կովկասում իրականացնելու համար: Թուրք-ադրբեջանական այս ցեղասպան դաշինքը լուրջ սպառնալիք է տարածաշրջանի ժողովուրդների համար»,- այսօր հայտարարել է ՀՀ ԱԳՆ-ն՝ նշելով, որ Թուրքիան հավաքագրում է օտարազգի ահաբեկիչ զինյալների և տեղափոխում նրանց  Ադրբեջան։

Արցախում ու Հայաստանում հայտարարվել է ռազմական դրություն ու զորահավաք։

Աղբյուր` Փաստինֆո