Փաստ ինֆո

Աշխարհն այնպիսի իրավիճակում է հայտնվել, որ մեծ պայթյունի պահանջ ունի։ Միջազգային արենան արդեն չի կարողանում ազդեցություն ունենալ Էրդողանի և Ալիևի վրա, դրա համար էլ անում են այն, ինչ ցանկանում են։ Այս մասին «Փաստինֆո»-ի հետ զրույցում ասաց «Արաբո» ջոկատի հրամանատար Մանվել Եղիազարյանը։

«Ամեն դեպքում՝ երրորդ համաշխարհային պատերազմը մոտ է, ում խելքին ինչ փչում՝ անում է։ Այնպես, որ դա է պատճառը, որ Էրդողանն արդեն դուրս է եկել կոնտրոլից, մարդը ոչ մեկի ազդեցությունը չի ճանաչում, նշանակում է՝ իր վախճանն է փնտրում»,- ասաց Եղիազարյանը։

Եղիազարյանը նշեց, որ հայերը համաշխարհային արենայում մենակ են մնացել, ուստի, պարտավոր ենք կռվելու մինչև վերջ։

«Եթե Թուրքիան է քիթը խոթում, ուրեմն մենք պարտավոր ենք նրանց դեմ էլ կռվել։ Թե դա ինչ արդյունքի կբերի, ես դա չգիտեմ։ Ամեն դեպքում՝ մենք պարտավոր ենք մինչև վերջ պայքարելու, եթե չենք ուզում աննամուս, գաղթական ժողովրդի անուն ձեռք բերել։ Իսկ Թուրքիան լկտի, անամոթ մասնիկ է, որն ուզում է արդարացնել իրեն, հայ ժողովրդի եղեռնը շարունակել, ավելին, ցանկանում է Ադրբեջանի ձեռքով վերջակետ դնի այն պատասխանատվությանը, որը կրում է Թուրքիան ժառանգաբար։ Այ դա է ուզում անել Թուրքիան, բայց մենք չենք ընկրկելու»,-նշեց Եղիազարյանը։

Համեմատելով 2016թ դեպքերի հետ՝ Եղիազարյանն արձանագրեց, որ պատերազմը մնում է պատերազմ, միայն խնդիրն այն է, որ Ադրբեջանն ունի համալրում, սակայն իրենք էլ շատ լավ հասկացել են, որ մեզ ընկճելը հեշտ չէ, իսկ մենք հասկացանք, որ մենք հաղթական ժողովուրդ ենք։ Ազատամարտիկի խոսքով, եթե 2016թ հավաքագրվում էր 300  մարդ, ապա այսօր 3000 մարդ է ցանկանում մասնակցել պատերազմին՝ «Արաբո» ջոկատի կազմում։

Հիշեցնենք, որ սեպտեմբերի 27-ին վաղ առավոտյան հակառակորդն Արցախի ուղղությամբ հարձակում է սկսել։ Ադրբեջանական զինված ուժերը թիրախավորել են քաղաքացիական բնակչությունը՝ ավելի քան 50 բնակավայր, այդ թվում՝ Ստեփանակերտը, Շուշին։

ԱՀ նախագահ Արայիկ Հարությունյանը սեպտեմբերի 27-ի երեկոյան տեղի ունեցած ասուլիսում հայտարարել է, որ Արցախի դեմ կռվում է ոչ թե Ադրբեջանը, այլ Թուրքիան, քանի որ ոչ միայն թուրքական զինատեսակներն են օգտագործվում, այլ նաեւ դրանք կիրառում են թուրքական զորամիավորումները։ «Փաստացիորեն ստեղծվել է մի իրավիճակ, երբ Արցախի ժողովուրդը մարտնչում է թուրք-ադրբեջանական դաշինքի դեմ։ Թուրքիան, որը մեկ դար առաջ բնաջնջել է իր պատմական հայրենիքում ապրող հայ ժողովրդին և մինչ օրս արդարացնում է այդ ոճիրը, ներկայումս հնարավոր բոլոր միջոցներով սատարում է Ադրբեջանին՝ այդ նույն ցեղասպան գործողությունները Հարավային Կովկասում իրականացնելու համար: Թուրք-ադրբեջանական այս ցեղասպան դաշինքը լուրջ սպառնալիք է տարածաշրջանի ժողովուրդների համար»,- սեպտեմբերի 28-ին  հայտարարել է ՀՀ ԱԳՆ-ն՝ նշելով, որ Թուրքիան հավաքագրում է օտարազգի ահաբեկիչ զինյալների և տեղափոխում նրանց  Ադրբեջան։

Արցախում ու Հայաստանում հայտարարվել է ռազմական դրություն ու զորահավաք։

Աղբյուր` Փաստինֆո