Փաստ ինֆո

Արցախից ստացած լուրերը հակասական զգացմունքների հորդացող հեղեղ է՝ մի կողմից՝ դիրքային առավելություններ, արժանի հակահարված, մյուս կողմից՝ վասն հայրենյաց հերոսացածներ: Ամեն մեկը՝ մի հայ ընտանիքի լույս, երկրի աղը, հայ գենը շարունակողն ու ապրեցնողը... Ու մեկ էլ կարդում եմ՝ «Մերոնք հակահարված են տվել հակառակորդին»... հակառակո՞րդ, այդպես ասում ենք պայքարի մեջ մտած ֆուտբոլային տարբեր թիմերին, ընդ որում, կապ չունի՝ դրսի, թե՞ մեր տեղական, քանզի ֆուտբոլը խաղ է և խաղի մեջ հաղթողներ ու պարտվողներ են լինում: Լինում է նաև արդյունք՝ ոչ : ոքի:

Բայց մահեր չեն լինում այս դեպքում, այսինքն, հակառակորդը չի հարձակվում՝ քեզ ոչնչացնելու մտադրությամբ, նախահարձակ չի լինում՝ բարբարոսների վարձկան գնդերով: Այդ՝ «մինչև մարդը իր ճամփան» դեռ հեռու-հեռու շնչավորը մեկ անուն ունի՝ «թշնամի», բառն էլ, բառի բովանդակությունն էլ, շնչածն էլ այլ է սրա: Եվ բնավ իմաստ չունի նրբացուցիչ տերմիններ հորինել մեր դարավոր թշնամուն հակառակորդի հանդերձ հագցնելով: Մեր առջև մեզ իսպառ ոչնչացնել ցանկացողը թուրքն է՝, որի մի մասը՝ սովետների կամոք դարձավ ադրբեջանցի...

ՈՒ մեր պաշտելի զինվորներն ու սպաները հակառակորդի դեմ պայքարում չեն զոհվում , այլ մեր հայրենիքը թշնամուց պաշտպանելով են հերոսաբար մահվան գնում: Այն թշնամուց, որին վերջին շրջանում նաև պատմության մեջ աննախադեպ՝ «կիրթ» որակում տրվեց: Սա «կոնֆլիկտ» չէ՝ ինչպես օտարներն են գնահատում, սա պատերազմ է, մեզ համար՝ հայրենական պատերազմ, հայրենի հողի վրա, մեր բնօրրանում ապրելու գոյաբանական կռիվ, իսկ նախահարձակ թշնամու՝ հերթական անգամ պատերազմը սարձազերծող թուրք-ադրբեջանական տանդեմի համար՝ իրենց նվաճողական, հայասպան քաղաքականության շարունակությունն է: ..

Նորից պիտի հիշեմ Աղասի Այվազյան՝ բազմատաղանդ ու մեծ հայի խոսքը, որը միշտ ժամանակից ու տարածությունից անդին է, մշտնջենական, հատկապես՝ հայերիս համար: «Մենք այսօր պատերազմական վիճակի մեջ ենք: Իսկ վերջինս իր օրենքներն ունի: Գուցե ես ամենաբարի մարդն եմ, բայց բարի լինելով հանդերձ, Հայաստանն է ինձ համար գերագույնը: Եվ չի կարելի հանդուրժել որևէ սպառնալիք Հայաստանին: Հայը չի կարող ներել թշնամական երևույթներ, ոչնչացում: Իսկ պաշտպանության միջոցներից մեկը դիմակայելն է, ոչնչացնողին ոչնչացնելը»:

Հեղինակ՝ Ա.Ե.

Աղբյուր` Փաստինֆո